1 Ni vedi kunda ne nt'hogola yedi kujink'ha ugoli mwingi, nt'hunyo ni yedi kujink'ha masawa na zahabu.

2 Mgoli na mkiwa waliganywa mwe kint'hu kimwenga, Zumbe Mnungu ni muumbi ywa wose.

3 Mnt'hu mta wengele ayaona yaihile na kukefisa, mna wahezi wagendeela kulongole enga mant'hunt'hu niyo walumila.

4 Kukeseleza na kumvika Zumbe Mnungu, kwegala ugoli, nt'hunyo no ugima.

5 Sila ya waihi imema miwa na mitego, mna yehe akuwamila moyo wakwe naande hale nayo.

6 Mhinize mwana sila ya wikazi wedi, naye haileke mpaka mwo udala wakwe.

7 Mgoli amwikaila mkiwa, naye akukopa ni mtumwa kwa yudya akumkopesha.

8 Yehe akuhanda uwihi naavune masulumizo, udahi wakwe wa kudamanya uwihi noubanangwe.

9 Mnt'hu mkise naavikilwe, kwaviya nk'hande yakwe awapangila wakiwa.

10 Mguluse mta lubezo na k'humbizi vihalawe, nk'humbizi na kuhomola nevihalawe.

11 Mta moyo wedi na milosi yedi, naande mbuya ywa seuta.

12 Zumbe Mnungu amwamila mta umanyi we kindedi, mna ahiga mbuli za mnt'hu hiyo mhuwila.

13 Msokezi agamba kuna simba kuse, naho niyo agamba neinikome mwe sila.

14 Mnomo wa pamp'he ni bome tali, aihiwe ni Zumbe Mnungu neingile umo.

15 Mwana aungisa mbuli za kihezi mwo moyo wakwe, mna ngoda ya makanyo neimuike hale naye.

16 Akumhujila mkiwa vileke akegenyezele ugoli wakwe, naye akumwink'ha mgoli geleko, wose nawande wakiwa

17 Tegeleza mbuli za wata mzungu, uike moyo wako utimile mahinizo yangu, 18 kwaviya weye nounde na kinyemi umwo unayaika mwo moyo wako, na kuyalonga kila lupisi. 19 Uyo huunga nimhinize dielo ni weye, vileke kawiilo dyako dinde kwa Zumbe Mnungu. 20 Hikuwandikila milosi milongo mitatu, ya makanyo na ulangilizi wedi, 21 vileke huhinize mbuli ziligane ne kindedi, naho mnt'hu anakuuza udahe kumwink'ha uhituzi.

22 Usekumhoka mkiwa kwaviya ni mkiwa, naho use kumnyima mkiwa uwagilwa wakwe mwe kitala, 23 kwaviya Zumbe Mnungu naawagombele, naye naawahoke ugima wawe wadya wakuunga wawahujileni.

24 Usekutenda umbuya na mnt'hu mta maya, hegu usekunda na uhamwenga na mta maya, 25 unase kukehiniza zinyendo zakwe, na kukeika mwenye mwo mtego.

26 Usekunda yumwenga ywawe wakuika lagano, hegu wakukimaila wakutigizwa, 27 uneva huna chochose cho kuliha, hata lusazi lwako lwa kugonela nekiguhigwe ukanda kukigonela.

28 Usekuusa kilagiso che mihaka ya kale, iyo yaikagwa ni wakale wako.

29 Togola eyuko mnt'hu mta umanyi mwe zindima zakwe? Uyo naawadamnyile ndima wakulu, haawadamanyile ndima want'hu heweina nt'hunyo.