1 Mnt'hu akugendeela kunda na moyo mdala umwo anenk'higwa maonyo mengi, naavunike naho haahone.

2 Wata uwagilwa wanapata upati, want'hu wanda na kinyemi, mna waihi wanalongoza, want'hu wakefisa.

3 Mnt'hu akuungisa mzungu amgela ise kinyemi, mna akunda hamwenga na pamp'he, aza ugoli wakwe.

4 Seuta ananda muwagilwa isi yanda itoga, mna seuta mta kumunk'hilwa ni matundu ya soni naaibanange isi.

5 Yeyose akukehamp'hikiza kwa miyawe, akeikila mtego wa kukegwiila mwenye.

6 Mnt'hu mwihi akegwila kwa kudamanya wavu wakwe mwenye, mna mnt'hu mhuwilwa akema na kunda na kinyemi.

7 Mhuwilwa amanya uwagilwa wa wakiwa, mna mnt'hu mwihi hakumanya mbuli izo.

8 Wata utani waungisa nk'humbizi mwo mzi, mna want'hu wata mzungu wahoza maya.

9 Mta mzungu anaita mwe kitala na mhezi, mhezi anda na maya na kubela naho hahana utondowazi.

10 Wakuungisa kwitila sakame wamwihiya mnt'hu haheina lema, mna want'hu wedi wamila wikazi wawe.

11 Mhezi alagisa maya yakwe pwilili, mna mta mzungu egala utondowazi.

12 Uneva kilongozi anategeleza mbuli zo udant'hi, wakulu we hasi yakwe wose nawande waihi.

13 Mkiwa na mnt'hu hekwink'hiza uwagilwa kwa wantu waligana kwa mbuli imwenga, Zumbe Mnungu awagela ung'azi meso yawe wose waidi.

14 Seuta akuwalamula wakiwa kwa uwagilwa, naauone ulongozi wakwe utoga mazuwa yose.

15 Makanyo ya kufyalika vagela mzungu, mna mwana akulekelwa adamanye ivo akuunga amgela soni nine.

16 Waihi wanalongoza, wihi wongezekela, mna wahuwilwa nawaone ukugwa kwa waihi.

17 Mkanye mwanao naye naakwink'he nt'hunyo, nounde ne kinyemi mwo moyo wako.

18 Haheina maona, want'hu waga mna kavikilwa mnt'hu yudya akuitimila sigilizi.

19 Mtumwa hakukanywa kwa milosi du, kwaviya hamwenga na kugamba kamanya mna yehe hakutimila.

20 Togola wamwona mnt'hu akulongesa haheina kufanyanya? Ni vedi kumhuwila mhezi kujink'ha yehe.

21 Akumhembeleza mtumwa wakwe kukongela mwo udodo, mwo uheelo mtumwa uyo eza kumgela nk'huswank'huswa kulongole.

22 Mnt'hu mta maya aungisa nk'humbizi, mnt'hu mta maya yatendese naye adamanyisa wavu.

23 Mta moyo mdala naaselezwe, mna mta moyo wa kukeseleza naapate nt'hogola.

24 Akukelunganya na mbavi ni mnk'hondo wa moyo wakwe mwenye, eva ligito dya aonelwe hahena kulonga mbuli.

25 Kuwogoha want'hu ni kuketegela mwenye, mna yeyose akumhuwila Zumbe Mnungu naande hant'hu hedi.

26 Want'hu wengi waungisa kukehembeleza kwa vilongozi, mna mnt'hu apata uwagilwa kulawa kwa Zumbe Mnungu.

27 Mnt'hu mta nyambi ni ihizo kwa wata uwagilwa, naye mhuwila ni ihizo kwa waihi.