1 Waihi waguluka haheina kuguluswa na mnt'hu yeyose, mna wahuwila watoga enga simba.

2 Umwo isi inanda na nk'humbizi yanda na vilongozi wengi, mna kwa mta umanyi no ubala isi yanda hedi.

3 Mnt'hu mkiwa akumhujila atendese ukiwa, uyo ni enga fula nk'hulu ikubananga ulozo.

4 Want'hu hewekutimila sigilizi wawatogola waihi, mna wakutimila sigilizi wahigana nawo.

5 Want'hu waihi hawakumanya uwagilwa, mna wadya wakumzungula Zumbe Mnungu wakimanyisa kindedi.

6 Ni vedi mkiwa akwikala kwa uhuwilwa, kujink'ha mgoli akwikala kwa kusaguka.

7 Mwana akutoza sigilizi ni mta mzungu, mna mbuya mhank'hu amgela soni ise.

8 Akukegenyezela ugoli kwa liba nk'hulu na kugenyezela upati, ugoli wakwe no wiite kwa mtuhu mta mbazi kwa wakiwa.

9 Akulemela kutegeleza miko, uyo hata kulombeza kwakwe kwamwihiya Mnungu.

10 Akumlangiliza mnt'hu ywedi adamanye yaihile, naagwe mwe dibome dyakwe mwenye, mna heweina masa waikilwa ayedi.

11 Mnt'hu mgoli akeona mwenye ana mzungu ha meso hakwe mwenye, mna mnt'hu mkiwa mta umanyi naaike pwilili mbuli za uyo mgoli.

12 Want'hu wedi wakanda na upati kwanda na kinyemi kikulu, mna waihi wakalongoza want'hu wakefisa.

13 Akufisa wavu wakwe hapate chochose, mna yehe akweiila na kuleka wavu wakwe naaonelwe mbazi.

14 Kavikilwa mnt'hu uyo mazuwa yose akumvika Zumbe Mnungu mna yehe akuutenda moyo wakwe kunda mdala naagwe mwe makunt'ho.

15 Kilongozi mwavu akulongoza wakiwa, ni enga simba ikubuma hegu kala dikukump'hukila.

16 Akulongoza vihile hana ubala, mna yudya akuihiwa ni upati wa soni naande na kinyemi mwo wikazi wakwe naho neekalise.

17 Mnt'hu akuzamilwa na masa ya kukoma mnt'hu, naande akangadika mpaka abanika, naho mnt'hu yeyose asekumwambiza.

18 Akwikala kwa uhuwilwa naayokolwe, mna mdant'hi naabanangwe pele.

19 Akulima nk'honde yakwe naapate nk'hande nyingi, mna akutimila mbuli za kihezi naande mkiwa.

20 Mnt'hu mhuwilwa naavikiliswe, mna yehe akuungisa ugoli kwa kipump'ha naasulumizwe.

21 Hiyo vedi kuzagula mnt'hu, want'hu wadamanya yaihile hata kwajili ya kibesu ka mkate.

22 Mnt'hu mdala aungisa kugulukila ugoli, naho hakumanya kugamba ukiwa wamwizila. 23 Akumkanya miyawe uyo naapate ayedi, kujink'ha yudya akumtogola kwa lulimi lwakwe.

24 Akuwabaila walesi wakwe, niyo agamba hiyo masa, uyo ni mbuya ywa wabanangi.

25 Mgila asongeza nk'humbizi, mna yudya akumhuwila Zumbe Mnungu naapate ayedi.

26 Yehe akukehuwila mwenye ni mhezi, mna akwikala kwa mzungu haadugane na maihi.

27 Yehe akuwapangila wakiwa hakuhungukilwa ni kint'hu chochose, mna yehe akulemela kuwakaula heweena kint'hu naaligitwe.

28 Waihi wakalongoza want'hu wakefisa, mna wakabanika, want'hu wedi wongezekela.