1 Enga balafu mwo lupisi lwa zuwa hegu fula mwo lupisi lwa ulozo, nivo vili kwa mhezi kwink'higwa nt'hunyo.

2 Enga chole mwo kwangadika kwakwe, hegu mbayuwayu mwo kupuluka kwakwe, ivi nivo dili ligito hadikudaha kumpata mnt'hu heheina masa.

3 Mkotya kwa falasi, lijamu kwa mp'hunda, ngoda nayo kwa mgongo wa mhezi.

4 Use kumhitula mhezi viligane no uhezi wakwe, sema unande enga yehe.

5 Mhitule mhezi viligane na uhezi wakwe, sema akakeona kunda mta mzungu ho undiilo wakwe.

6 Akwigala ulosi kwa mkono wa mhezi ni enga kukesenga viga hegu kukezunguila makunt'ho.

7 Enga viga va mnt'hu aholomp'hale, nivo ili ngelo mwo mnomo wa mhezi.

8 Kumwink'ha mhezi nt'hunyo ni enga kuika iwe mwe nk'humbaiwe.

9 Enga mnt'hu akoligwe akugeza kuulava mwiwa mwo mkono wakwe, nivo ili ngelo mwo mnomo wa mhezi.

10 Mnt'hu amwink'hile ndima mhezi hegu mnt'hu akukolwa, ni enga akulasa akalumiza kila mnt'hu.

11 Mhezi akuuhiya mhezi wakwe ni enga kuli dikudya matahika yakwe.

12 Mhezi atendese ana kawiilo kujink'ha wose wakukeona kunda na mizungu mna kumbeche hawana nayo.

13 Mnt'hu msokezi agamba, "Uko kuse iyuko simba, miye hikudaha kuita uko!"

14 Enga ivo lwivi lukuzunguluka mwe zibawaba zakwe, nivo vili kwa mnt'hu msokezi ukukehitula mwo lusazi lwakwe.

15 Mnt'hu msokezi agela mkono wakwe mwe kihungu, mna hakudaha kuuvuza naho mwo mnomo wakwe.

16 Mnt'hu msokezi akeona ni mta mzungu mwe meso yakwe mwenye, kujink'ha want'hu mfungate wakudaha kuhitula kwa mzungu.

17 Mnt'hu akukeingiza mwe nk'humbizi hiyo yake ni enga mnt'hu akutoza magutwi ya kuli dina maya.

18 Enga mnt'hu mkilalu akusezigila ndilija zo moto hegu misale ye file.

19 Nivo vili mnt'hu akumdant'hiliza myawe niyo agamba, "Nehatanila du!"

20 Heheina nk'huni moto haukudaha kukwela, haheina msongezi nk'humbizi yasila.

21 Enga ivo zili nk'hala hegu nk'huni zikukwela niyo zanda moto, nivo eli mnt'hu mta nk'humbizi akuungisa nk'humbizi.

22 Mbuli ya mnt'hu msongezi ni enga nk'hande imwile, ikwiingilisa mndani mwe zinda za mnt'hu.

23 Enga vyombo va ulongo vikulugwe, nivo ili milomo mihufu na milosi ina mwiiile yakukawiila wiihi.

24 Mta maya afisa maya yakwe kwa milosi yedi, mna ana nyambi kwo moyo wakwe.

25 Analonga vedi usekumhuwila, kwaviya mwo moyo wakwe kuna uwihi utendese.

26 Vadahika akafisa uwihi wakwe kwa udant'hi mna nyendo zakwe ziihile nezimanyike kwa wose.

27 Akumsimbila miyawe bome nengile mwenye, akuditongolosa iwe nedimuuiye mwenye.

28 Akulonga udant'hi awaihiza wadya akuwalumiza, akukehembeleza naye egala ubanagi.