1 Izi nizo ngelo nt'huhu za seuta Selemani zawandikagwa ni want'hu wa Hezekia, seuta ywa Yuda.

2 Ni ukulu wa Mnungu kufisa mbuli, mna ni ukulu wa seuta kuzibunk'hula zimbuli.

3 Enga mbingu ivo zi hale ne isi, nivo ili mioyo ya maseuta haikudahika kupelemba.

4 Hausa viputiputi mwe madini ya masawa, naho msani naakudamanyile kint'hu chedi.

5 Wahause waihi ha seuta, niho ulongozi wakwe noutoge kwa sila ya uwagilwa.

6 Use kukekweza mwenye ha seuta, hegu usekuketenda mnt'hu mkulu, 7 kwaviya vaungwa ute kwitangwa, kujink'ha kugeligwa soni ha mkulu kwa kiya ukione.

8 Usekusunguza kwigala kwe kitala mbuli uiyone. Uneva muona mtuhu aneza kugamba huna kindedi, weye noutende vivihi?

9 Uneva unadamanya ulangilizi na mbuyayo, kila yumwenga ywenyu asekulava kinyele cha miyawe. 10 Want'hu wasekumanya huna kinyele, niyo wakebanangila zina dyako mazuwa yose.

11 Mbuli ikulonga mwo lupisi uwo kinanalwo, ni enga zahabu ihambigwe mnanga mwe madini ya masawa.

12 Makanyo ya mta mzungu kwa mnt'hu akutegeleza, ni yedi kujink'ha mp'hete hegu vint'hu va zahabu yedi.

13 Enga mp'heho ya seluji mwo lupisi lwo uvuni, nivo eli mwigala ulosi mhuwilwa kwa wadya wakumlagiza, kwaviya awenk'ha kinyemi wakulu wakwe mwe mioyo yawe.

14 Enga viya mavunde ne nk'hung'nt'ho haheyeina fula, nivo eli mnt'hu akukeduvya kwa nt'hunyo izo akuzilava.

15 Kwa kufinyiliza kilongozi adaha kunda mhufu, lulimi lwadaha kutula mavuha.

16 Uneva unaubwila uki dya kwa kukint'ha, Unagendeela kuudya kwa uhank'hu wadaha utahike. 17 Usekumtalamkila miyao nk'hanana nyingi, sema anakusokele niyo akuihia.

18 Mnt'hu akulava uwona wa udant'hi mwa miyawe, ni enga lungu na sime hegu msale.

19 Kumkawiila mnt'hu hiyo mhuwilwa mwo lupisi lwa makunt'ho, ni enga zino dikuluma hegu kiga kivunike.

20 Akukema wila kwa mnt'hu mta kinyulu, ni enga kuhambula suke mwo lupisi lwa mp'heho, hegu kugela mazi ya limao mwe nk'hwenge.

21 Mnk'hondo ywako ananda na sala mwink'he nk'hande, akanda ne nk'hilu mwink'he mazi anywe,

22 kwa kudamanya ivo, noumtende ande na soni, enga makala ya moto mwo mtwi wakwe, Zumbe Mnungu nae naakwink'he nt'hunyo.

23 Enga mp'heho ya mkomamahanya ivo ikwigala fula, iviya iviya akulonga udant'hi kwegala maya.

24 Ni vedi kwikala mnk'handa mwe digulu dye nyumba, kujink'ha kwikala mwe nyumba imwenga na mvele mta nk'humbizi.

25 Enga viya mazi ye mp'heho kwa mta nk'hilu, nivo ili mbuli yedi kulawa isi ya hale.

26 Mhuwilwa akuzumila kutimila mbuli yo mwihi, ni enga n'choko ingeligwe nt'hagata hegu sima ditibulwe.

27 Hivo vedi kudya uki mwingi, naho hiyo vedi kukezungila nt'hunyo yako mwenye.

28 Uneva hukuyadaha maya yako, huna wambizi enga mzi hewiina gomela, una uhufu mwo kukump'hukilwa.