1 Moyo wa seuta u mwe udahi wa Zumbe Mnungu, aulongoza enga kazuto kakuseleza mazi hohose hadya akuunga.

2 Udamanyi wa mnt'hu waoneka kuligana ha meso hakwe, mna Zumbe Mnungu aihima mioyo.

3 Kudamanya mbuli yedi ya uwagilwa, yamwelela Zumbe Mnungu kujink'ha nt'hambiko.

4 Mta moyo mdala na wa kukeduvya, walagisa pwilili wavu wa waihi.

5 Minyanyiko ya mta kukombatiza yegala ugoli mwingi, mna kila mta kipump'ha aheela ukiwa.

6 Ugoli ukupatikana kwa udant'hi, ni enga mosi ukomboka naho ni mtego we file.

7 Kitugu cha waihi nekiwabanange, kwaviya walemela kudamanya ayedi.

8 Sila ya mta masa yaga, mna lugendo lwa mnt'hu hahena masa ni lwedi.

9 Ni vedi kwikala mnk'handa mwe digulu he nyumba, kujink'ha kwikala mwe nyumba imwenga na mvele mta nk'humbizi.

10 Mnt'hu mwavu aungisa uwihi, hata kwa mbuyaye hakuona mbazi.

11 Unamsengela mta utani, mbwalasi apata mzungu, unamhiniza mta mzungu wamwink'ha umanyi.

12 Mta uwagilwa ayamanya yadya yakudamanywa mwe zinyumba za waihi, naye naawabange waihi.

13 Akulemela kutegeleza ndilo ya wakiwa, naye haategelezwe umwo akazungula wambizi.

14 Geleko dikulavigwa kwa kinyele dyahausa maya, naho matundu ya soni yafisigwe mwe suke yahoza maya.

15 Umwo uwagilwa unadamanyika kwa uwedi wagela kinyemi kwa wata uwagilwa, mna ni uhuza kwa awo wakudamanya uwihi.

16 Mnt'hu akwaga kulawa mwe sila yo umanyi, naahumule mwe fyo dya wabanike.

17 Mnt'hu akuungisa vint'hu vikumunk'hilwa naande mkiwa, yoyose akuungisa kudya kwa uhank'hu haande mgoli.

18 Waihi nawapate masulumizo heyekuwapata wawagilwa, hewekuhuwila nawasulumizwe hant'hu ha wahuwila.

19 Ni vedi kwikala kwe dijangwa, kujink'ha kwikala na mvele mta nk'humbizi na mkalalizi.

20 Mwe nyumba ya mta mzungu kuna kindolo che nk'hande yedi na mavuta, mna mnt'hu mhezi adya kihunt'he.

21 Yehe akuutimila uwagilwa na lukunde, naapate ugima na upati na nt'hunyo.

22 Mnt'hu mta mzungu adaha kuukup'hukila mzi una ludole na kugwesa magomela wakuyahuwila.

23 Akwamila mnomo wakwe na lulimi lwakwe, akeika hale no uwihi.

24 Mnt'hu mta moyo mdala na kukeduvya, lubezo nidyo dizina dyakwe, udamanyi wakwe umema wefenyi na udala wo moyo wakwe.

25 Kumunk'hiswa kwa msokezi niyo file yakwe, kwaviya mikono yakwe haikuungisa kudamanya ndima.

26 Msi wose mwavu amunk'hilwa kupata kint'hu, mna mhuwila alava kwa ukise.

27 Nt'hambiko ya mnt'hu mwavu ni ihizo kwa Zumbe Mnungu, yaihiza vitendese akailava kwa utondwe.

28 Muwona mdant'hi naage, mna milosi ya mta akwiva ya kindedi naagendeele.

29 Mnt'hu mwavu akelagisa kunda katoga, mna mnt'hu mhuwilwa azifanyanya sila zakwe.

30 Hahana mzungu hegu umanyi hegu mbuli yedi yoyose ya mnt'hu, ikudaha kuhigana na Zumbe Mnungu.

31 Wadaha kuika lumwe falasi kwa nk'hondo, mna uhumi walawa kwa Zumbe Mnungu.