1 Uhituzi wa ujalamu, waseleza maya, mna ulosi una luhahila lwakwezela maya.

2 Lulimi lwa mta mzungu lwagenyeza umanyi, mna milomo ya wahezi yalonga uhezi.

3 Zumbe Mnungu aona kila kint'hu, ampelemba mnt'hu aihile na mnt'hu ywedi.

4 Ulosi wedi wegala ugima, mna mbuli za lulimi zabananga moyo.

5 Mhezi abela mahinizo ya ise, mna akuzumila makanyo naande na mzungu.

6 Mwe kaya ya mnt'hu ywedi mna ugoli utendese, mna icho wakupata waihi ni makunt'ho.

7 Mnomo wa mta mzungu wagenyeza umanyi, mna hiyo enga ivo ili milomo ya wahezi.

8 Malavo ya waihi yaihiza kwa Zumbe Mnungu, mna kulombeza kwa muwagilwa kwegela kinyemi kwa Mnungu.

9 Lugendo lwa waihi ni ihiyo kwa Zumbe Mnungu, mna Mnungu awaunga wadya wakutimila uhuwilwa.

10 Masulumizo yamgoja yudya akuleka udamanyi wedi.Yeyose akuihiya kukanywa naabanike.

11 Uneva Zumbe Mnungu adaha kuona kila kint'hu kikwe isi ya wabanike, fanyanyi za mnt'hu zadaha vivihi kukefisa kwakwe?

12 Mta lubezo aihiwa na makanyo, haaunge ulangilizi kulawa kwa wata mzungu.

13 Moyo una kinyemi watenda futa isangale, mna usungu wa moyo wautenda futa isekusangala.

14 Mta umanyi azungula uwedi, mna wahezi weguta uhezi wawe.

15 Mazuwa yose ya mnt'hu akuhujilwa yaiha du, mna mta moyo usangale ni wila houkusila.

16 Ni vedi kunda na vint'hu vigeke na kumvika Zumbe Mnungu, kujink'ha kunda na ugoli mwingi hamwenga na makunt'ho.

17 Ni vedi kudya ugali na mboga za mani hant'hu hana lukunde, kujink'ha kudya ugali na nyama hant'hu hikuungwa.

18 Mnt'hu mta maya asongeleza nk'humbizi, mna heena uhufu wa maya ahoza nk'humbizi.

19 Sila ya mnt'hu msokezi ikomela miwa, mna sila ya mnt'hu mhuwilwa ipwilika enga sila yedi nk'hulu.

20 Mwana mta mzungu ambwedeza ise, mna mhezi ambela nine.

21 Uhezi ni kinyemi kwa mnt'hu heena ubala, mna mta umanyi asagula sila yedi.

22 Mizungu yabanika kwa kuswesa ulangilizi, mna kwa walangilizi wengi kwatenda kwedi.

23 Kulava uhituzi wedi kwegala kinyemi, mbuli ikuungwa kwa lupisi lwakwe ni yedi vitendese.

24 Sila ya mta mzungu yegala ugima, naho yamkindila kuhubugila ko mnyongomela.

25 Zumbe Mnungu abananga wikazi wa want'hu wata kitugu. Mna amila mihaka ya wikazi wa mvele abanikilwe ni mgosiwe.

26 Fanyanyi za mnt'hu mwiihi ni ihizo kwa Zumbe Mnungu, mna milosi ya want'hu wedi yamwink'ha kinyemi.

27 Akumunk'hilwa na upati wa matundu ya soni, uyo awangadisa wanduguze, mna akuihiwa na kuhujila neekale. 28 Moyo wa mnt'hu mhuwilwa wafanyanya ukanda haunati kuhitula, mna moyo wa mnt'hu mwiihi wafanyanya du yaihile.

29 Zumbe Mnungu ehale na want'hu waihile, mna aweva want'hu wakudamanya yakwelela.

30 Mnt'hu mta mbazi aibwedeza myoyo ya want'hu, naho mbuli yedi yagela ludole mwo mwili.

31 Mnt'hu akutegeleza makanyo yedi, anda ni yumwenga mwa want'hu wata mizungu.

32 Akulemela kuhinizwa, uyo akebela mwenye, mna akuzumila makanyo apata umanyi.

33 Kumvika Zumbe Mnungu kwamhiniza mnt'hu mizungu, naho uneva ukei kutunywa vaungwa unde mjalamu.