1 Ni vedi mkiwa akwikala kwa uhuwilwa, kujink'ha mnt'hu mhezi uyo milomo yakwe ikulonga udant'hi.

2 Naho hiyo vedi kwa mnt'hu kukombeka haheina umanyi, naho akusunguza naakobadike.

3 Mnt'hu anakebanaga kwa uhezi wakwe, moyo wakwe wamuihiya Zumbe Mnungu.

4 Ugoli wegala wambuya wengi, mna mkiwa alekwa na wambwiyaze wa hagihi.

5 Muwona mdant'hi haaswese kusengelwa, naye akulonga udant'hi haalekelwe du.

6 Want'hu wengi wakehembeleza kwa wakulu, na kila yumwenga ni mbuya ywa mnt'hu akulava geleko.

7 Mnt'hu mkiwa aihiwa ni wanduguze, wambuyaze nawo wakeika hale naye, hata anawetanga haawaone.

8 Akupata mzungu auungisa moyo wakwe mwenye, akuzumila umanyi naapate yedi.

9 Muwona mdant'hi haaswese kusengelwa, naye akulonga lulimi naabanangwe.

10 Havikuwagila mhezi ekale mwo wikazi wedi, naho hevinde vedi kwa mtumwa kuwalongoza wakulu.

11 Mzungu wa mnt'hu wamwink'ha kufinyiliza, naho ukulu kwakwe ni kuwausila want'hu masa yawe.

12 Maya ya seuta ni enga simba ikubuma, mna uwedi wakwe ni enga mnyuzu mwa mani.

13 Mwana mhezi ni ubanangi kwa ise, naho nk'humbizi ya mvele ni enga fula ikunya heikusila.

14 Nyumba na ugoli ni ukipe akupata mnt'hu kulawa kwa welesi wakwe, mna mvele mta mzungu alawa kwa Zumbe Mnungu.

15 Usokezi wamgela mnt'hu mwe zint'hongo, naye mnt'hu msokezi naaone sala.

16 Akutimila sigilizi auika vedi ugima wakwe, mna yehe akubela sila zakwe naabanike.

17 Akumwambiza mkiwa amkopesha Zumbe Mnungu, Zumbe Mnungu naamlihe kwa udamanyi wakwe wedi.

18 Muogole mwanao kukei kukanda kuna kawiilo, mna sema unamtowe niyo abanika.

19 Mnt'hu mta maya yatendese naapate makunt'ho, uneva unamuyokola vaungwa udamanye ivo kaidi.

20 Tegeleza ulangilizi naho uhokele mahinizo, upate kunda no mzungu mwa mazuwa yako yakwiza.

21 Kuna mbuli nyingi mwo moyo wa mnt'hu, mna kiya akuunga akidamanye Zumbe Mnungu nicho nekinde.

22 Icho kikuungigwa kwa mnt'hu ni lukunde lwa ulo na ulo, nevinde vedi kwa mnt'hu mkiwa kujink'ha mnt'hu mdant'hi.

23 Kumvika Zumbe Mnungu kwegala ugima, naho mnt'hu naahumule akanda kakint'ha, haheina kunda na masulumizo.

24 Mnt'hu msokezi ni enga mnt'hu akugela mkono wakwe mwo lwiga lwe nk'hande, mna hakudaha hata kuvuza mwo mnomo wakwe.

25 Msengele mta utani na mbwalasi naapate ubala, mkanye mta mzungu naye naapate umanyi.

26 Akumbaila ise na kumgulusa nine, ni mwana akugela soni na lubezo.

27 Mwanangu unaleka kutegeleza mahinizo, nowage hale ne mbuli yo umanyi.

28 Muwona akuguha matundu ya soni atanila kitala, na mnomo wa mnt'hu mwavu wamela wiihi.

29 Usengelo uikwa kwa wadya wakutana, ngoda ziikwa kwa kuwatowela wahezi.