1 Mzungu uzenga nyumba yakwe, nyumba ina mikimailo mfungate. 2 Kachinja mifugwa kwajili ye fugo, divai yakwe kaika chalumwe. Naho kaika lumwe meza yakwe. 3 Kawasigila wasank'hani wakwe ko mzi, wawetange want'hu kwo lunenengwa lwe vigulu. 4 "Yeyose eli mhezi eze aha!" Na yeyose mbwalasi amgamba, 5 "Soo ukadye nk'hande, naho unywe divai nidamanye. 6 Lekeni sila zenyu za uhezi vileke mwikalise, mtimile sila zo uwagilwa."

7 Mnt'hu yeyose akumkanya mta lubezo azungula kuhomolwa, uyo akumuogola mwiihi enk'higwa makunt'ho. 8 Usekumkanya mta lubezo kwaviya naakuihiye, mkanye mta mzungu na yehe naakuungise. 9 Mhinize mta mzungu na yehe naatendese kunda na umanyi, naho mhinize mbala na yehe naatendese kunda mbala.

10 Kumvika Zumbe Mnungu ni nk'hongelo yo umanyi, na kummanya yudya akukile, ni kupata ubala. 11 Kwaviya kwa wambizi wangu, mazuwa yako nayagenyele, naho wikazi wako nounde wa mazuwa mengi. 12 Uneva una mzungu noukuwagile weye mwenye, naho unabela noupate makunt'ho weye mwenye.

13 Mvele mhezi ana lwasu, hamanyize kint'hu naho hana soni. 14 Ekala mwe nk'hili ye nyumba yakwe hegu aika difumbi dyakwe hant'hu henuke ho mzi, 15 na kuwetanga want'hu wakomboka mwe sila, want'hu wakuita kwe zindima zawe. 16 "Yeyose eli mhezi eze aha!" Na wose weli wahezi soni uku kundani. 17 "Mazi ya ubavi yanamwiile vitendese, mkate ukudigwa kwa kinyele ni wedi utendese." 18 Mna hawamanyize kugamba uko kundani kuna wabanike, wata kwiza wa uyo mvele weyumo mndani ko mnyongomela.