1 Mizani ya udant'hi ni ihizo kwa Zumbe Mnungu, mna kihimo kikuhima vedi ni kinyemi kwakwe.

2 Want'hu wata kitugu wengilaga soni, mna want'hu wakukeseleza wana mzungu.

3 Uwedi wa wata uwagilwa wawalongoza, mna want'hu hiyo wahuwilwa nawabanangwe ne zinyambi zawe.

4 Ugoli hauna kint'hu mwe dizuwa dyo usengelo, mna uwagilwa wayokola kulawa mwo kubanika.

5 Uwagilwa wa want'hu heweena lema wawadamanyila sila yedi, mna waihi wakebananga woho wenye.

6 Want'hu wata uwagilwa nawayokolwe ni uwagilwa, mna wata finju nawabanangwe.

7 Mwiihi anabanika na kawiilo dyakwe dibanika, vose akukawiila kwa ludole lwakwe lwanda hi kint'hu.

8 Mnt'hu mta uwedi ayokolwa mwe makunt'ho, na mnt'hu mwiihi anda uumwo mwe makunt'ho.

9 Hekumvika Zumbe Mnungu abananga watuhu kwa milosi yakwe, mna mnt'hu ywedi ayokolwa kwa umanyi wakwe.

10 Want'hu wedi wanapata yedi mzi wose wanda na kinyemi, na waihi wanabanangwa want'hu nawatowe ng'helegele.

11 Mzi wanda na upati kwaviya want'hu wakwe wamvika Zumbe Mnungu, mna mzi wabanangwa kwa milosi ya want'hu waihi.

12 Akumbela miyawe hana ubala, mnt'hu mta mzungu anyamala du.

13 Msongezi aza kawiilo, mna mnt'hu mhuwilwa anda na kinyele.

14 Haheina ulangilizi, si yabanika, mna hana walangilizi wengi handa hatondowala.

15 Akumwamila mta kwiza neeze akekalalize, mna hekuwamila want'hu enga awo naande na kutondowala.

16 Mvele ywedi naatunywe,

mgosi heena mbazi naande mgoli du.

17 Mnt'hu mkise anda na upati yehe mwenye, mna mnt'hu aihile akelumiza yehe mwenye.

18 Upati wa mnt'hu mwihi ni wa udant'hi, mna akudamanya yedi naapate upati wa kindedi.

19 Mnt'hu akuunga ande mhuwilwa naande mgima, mna akusagula kudamanya maihi naabanike.

20 Zumbe Mnungu awaihiya vitendese want'hu wata myoyo ihile, mna elelwa ni wadya wakudamanya uwagilwa.

21 Ikindedi mwiihi haadahe kunyilika kusengelwa, mna want'hu wedi nawayokolwe.

22 Mvele ywedi heena mzungu, ni enga mp'hete ya zahabu imwe mp'hula ya nguluwe.

23 Makawiilo ya want'hu wana uwagilwa yandaga yedi, kawiilo dya waiihi di mwa maya yatendese ya Mnungu.

24 Akulava kwa ukise andilisa mgoli, mna mnt'hu mgila akedamanyila ukiwa.

25 Mnt'hu mkise naande mpati, akumwambiza miyawe naye naambizwe.

26 Want'hu wamligita akufisa nk'hande akagoja yombe dikwele, mna wamuungila uvikilwa yudya akutaga.

27 Akuzungula kudamanya ayedi apata uwagilwa, mna akuzungula kudamanya yaihile naambwiilwe ni yaihile.

28 Akuhuwila ugoli wake naatomoke enga zani dinyaile, mna mhuwila naande enga zani teke.

29 Yeyose akwigala makunt'ho mwe mp'huga yakwe haande na kint'hu ko uheelo.

Mna mhezi naande mtumwa kwa wata mizungu.

30 Udamanyi wa mnt'hu muwagilwa wegala ugima, mna ubanangi wahausa ugima.

31 Uneva muwagilwa apata nt'hunyo aha he isi, kindedi mnt'hu mta wavu naye naasulumizwe.