1 Milosi ya Aguli mwanawe Yake. Ulosi uwo wa mnt'hu uyu amgambilaga Itieli na Ukali.

2 Miye ni mhezi kujink'ha want'hu wose,

hina umanyi wa kimnt'hu.

3 Hikehinize mzungu,

naho hina umanyi mwa mbuli za Mnungu uyo Akukile.

4 Ni ani akweile kwe mbingu na kuseela? Niani atozile mp'heho mwo mkono?

Ni ani akuyazinganiza mazi mwe suke yakwe?

Ni ani aikile mihaka yose mwe isi?

Zina dyakwe niye ani?

Zina dya mwanawe we kilume etangwa ani?

Nigambileni uneva mum manya!

5 Kila mbuli ya Mnungu ni ya kindedi, yehe ni nk'hindo kwa wose wakumgulukila. 6 Usekongezela mbuli zako mwe zimbuli zakwe, sema akakukanya nawe niyo wanda mdant'hi.

7 Nakulombeza vint'hu viidi weye Zumbe Mnungu, usekuleka kunink'ha umwo handa nikei kubanika. 8 Uhause lulimi na udant'hi, usekunink'ha ukiwa hegu ugoli, unink'he nk'hande ya kukint'ha kila zuwa, 9 sema heguta niyo nakulemela, niyo nagamba, Zumbe Mnungu niye ani? Hegu sema handa mkiwa niyo nabawa, na kudihomala dizina dyako weye Zumbe Mnungu.

10 Usekumsongeza mndima kwa mkulu ywakwe, sema akakuligita na kuoneka na masa.

11 Weyuko want'hu awo wakuwaligita tate zawe, naho hawakuwavikila mami zawe.

12 Weyuko want'hu wakukeona kunda ni wedi, mna wakei kukesunt'ha usavu wawe.

13 Weyuko watuhu wana wefenyi, wabela kila kint'hu icho wakuona.

14 Weyuko want'hu meno yawe ni enga sime naho magego yawe ni enga ngola. Wakeika lumwe kuwadya wakiwa wa mwe isi, na wadya haweina kint'hu kulawa mwa want'hu .

15 Mnyula ananawo wanakike waidi wakuila, watendigwe "Nink'he!"

Kuna vint'hu vitatu hevikwiguta, naho viyuko vine hevikugamba Ikint'ha.

16 kikuta

nda ya mvele heikweleka,

isi heikwiguta mazi,

na moto houkugamba, higuta.

17 Uneva mnt'hu anambela ise, na kumbela nine, kungulu dya kwe dikolongo nedimnonole meso yakwe niyo dyadigwa ne degenyika.

18 Kuna mbuli nt'hatu kwangu zo kwehela, naho mbuli nne hikuzimanya.

19 Lugendo lwa mwewe ko ulanga

lugendo lwa zoka mwo luwe,

lugendo lwa meli mwe bahali,

na icho kikuwabwedeza mgosi na mvele.

20 Lugendo lwa mvele mhabwasi ni uno, Yehe adya nk'hande niyo akesunt'ha mnomo wakwe, niyo agamba "Hidamanye masa yoyose!"

21 Kuna mbuli nt'hatu zinalaila isi yazingiza, naho kwa mbuli nne haikudaha kufinyiliza.

22 Mtumwa ananda seuta,

Mhezi akint'hize kila kint'hu icho akuunga ukudya.

23 Mvele hekuungwa kulombigwa akeza kulombigwa, mndima ywa kivele akuguha hant'hu ha mvele mta inyumba.

24 Kuna viumbwa vine vidodo vitendese mwe isi, mna vina ubala utendese.

25 Mswa ni viumbwa heviina ludole, mna wakeikila nk'hande mwo lupisi lwa zuwa.

26 Mp'helele ni viumbwa heviina udahi, mna vakedamanyila nyumba zawe mwe zinyuwe.

27 Sige hazina seuta, mna zose zagenda hamwenga mwa matuluma.

28 Gondo dyadaha kugwiligwa ne mikono, mna wadaha kudiona mwe zinyumba ze kiseuta.

29 Kuna viumbwa vitatu vikwelela vikagenda, naho hana viumbwa vine vikugenda kwa wefenyi.

30 Simba ni kala dina ludole kujink'ha makala yose, naho hadikogoha kala dyodyose.

31 Zogolo dikugenda kwa kukeduvya na vulata, na seuta ha want'hu wakwe.

32 Uneva kudamanya uhezi niyo waketogola mwenye, hegu uneva kukeika lumwe kudamanya yaihile, unyamale. 33 Kwaviya enga viya kukuchulisa mele wapata mabongo, naho unamtowa mnt'hu mwe zip'hula naalawe sakame, iviya iviya unanda na maya kwalaila nk'humbizi.