1 Izi ni ngelo za Selemini,

Mwana mta mzungu ni kinyemi kwa ise,

mna mwana mhezi ni kinyulu kwa nine.

2 Ugoli ukupata kwa sila ihiile hiyo wedi, mna uwedi wamyokola mnt'hu kulawa mwo kubanika.

3 Zumbe Mnungu hakuwaleka want'hu wedi wapate gumbo, mna abananga zindima za want'hu waihile.

4 Usokezi watenda mnt'hu ande mkiwa, mna mnt'hu akukombeka apata ugoli.

5 Mta umanyi aduganya nk'hande mwo ulozo, kugona mwo lupisi lwa uvuni ni kupata soni.

6 Mnt'hu ywedi apata uvikilwa yehe mwenye, mna mnt'hu mwavu adamanya kitugu.

7 Nk'humbukila ya wata uwagilwa ni ya uvikilwa, mna waihi nawajaligwe vitendese.

8 Mta mzungu mwo moyo wake azumila sigilizi, mna mnt'hu akulonga uhezi du naabanike.

9 Akwikala kwo uhuwilwa kwa Zumbe Mnungu neekalise mwe isi, mna akwaza sila zakwe naamanyike du.

10 Uyo akukonyeza kwa uwihi egala masulumizo, mna akukanya kwa kindedi egala utondowazi.

11 Mta uwedi ni nc'hoko yo ugima, mna mnt'hu mwavu adamanya kitugu.

12 Uwihi wegala nk'humbizi, mna lukunde lwagubika masa yose.

13 Mzungu wapatikana mwe milomo ya wata mizungu, mna wahezi nawasengelwe.

14 Wata mzungu waika umanyi, mna kwa wadya wahezi wakulalata wegala ubanangi.

15 Ugoli wa mnt'hu mgoli ni mzi wawe uzengelwe gomela, mna ukiwa wa mnt'hu mkiwa wamwigaila ubanangi.

16 Maliho ya muwagilwa ni ugima, mna mwihi anda mwo wavu.

17 Akuzumila kukanywa, uyo anda mwe sila yo ugima, mna yeyose akulemela kuogolwa naande kaga.

18 Akumwiihiya miyawe kwa kinyele uyo mlulimi, akumsongeleza miyawe uyo ni mhezi.

19 Hana mbuli nyingi hahakuswesa uwihi, mna akukindila lulimi lwakwe ana mzungu.

20 Ulosi wa mnt'hu ywedi ni enga masawa yedi, mna fanyanyi za mnt'hu mwiihi hazina uwagilwa wowose.

21 Ulosi wa mnt'hu ywedi waungigwa ni want'hu wabindile wingi, mna wahezi waganika kwa kuswesa ubala.

22 Uvikilwa wa Zumbe Mnungu wegala ugoli, mna haikwigala kinyulu.

23 Kwa mhezi kudamanya wavu ni enga mseigo, mna want'hu wata umanyi wanda na kinyemi mwo mzungu.

24 Icho akogoha mnt'hu mwihi nicho kikumpata, mna icho akuunga mnt'hu ywedi nicho akupata.

25 Kisingisa kikaomboka chomboka na mnt'hu mwiihi, mna mnt'hu ywedi atogezwa mazuwa yose.

26 Enga ivo dili kwazu mwa meno na mosi mwa meso, nivo eli mnt'hu msokezi kwa mkuluwe.

27 Kumvika Zumbe Mnungu kwatenda wikalise mwe isi, mna kwikala kwa mnt'hu mwiihi ni kudodo.

28 Kawiilo dya mnt'hu ywedi dina kinyemi, mna kawiilo dya mnt'hu mwiihi hi kint'hu.

29 Zumbe Mnungu awamila want'hu wedi, mna wakudamanya maihi nawabanangwe.

30 Want'hu wedi hawahauswe mwe isi, mna waihi hawekale mwe isi.

31 Mwo mnomo wa mnt'hu ywedi mwalawa mzungu, mna lulimi lwa mnt'hu mwiihi nolusengelwe.

32 Milomo ya want'hu wedi wayamanya yadya yakuzumilwa kulongwa, mna milomo ya want'hu waihi walonga du maihi.