1 Divai yagela lubezo, p'hombe nayo yagela nk'humbizi, akuzaganywa ni ayo kaswesa mzungu.

2 Maya ya seuta ni enga simba ikubuma, akumgela maya, ahosa wikazi wakwe.

3 Ni mbuli ye nt'hunyo mnt'hu kukeika hale na nk'humbizi, mna wahezi nawo wakuungisa nk'humbizi.

4 Mnt'hu msokezi hakuunga kulima mwo lupisi lwa kahanda, ivo mwo lupisi lwa uvuni naazungule mna haapate chochose.

5 Fanyanyi za mnt'hu zikefisa enga mazi matali, mna mta umanyi ayateka.

6 Want'hu wengi wakeduvya kunda wedi, mna mhuwilwa ni ani akudaha kumpata?

7 Mnt'hu mta uwagilwa ekala wikazi houna uwihi, hata wanawe naawaleke nawavikilwe.

8 Seuta anekala mwe difumbi dyakwe dyo usengelo, aukombaganya uwihi wose kwa meso yakwe.

9 Ni ani akudaha kugamba hikekukiza moyo wangu, miye ni ywedi naho hina wavu?

10 Mizani yo udant'hi ne vihimo vo udant'hi, vose ni ihizo kwa Zumbe Mnungu.

11 Hata mwana amanyika kwa udamanyi wakwe, uneva udamanyi wakwe ni wedi na uhuwila.

12 Magutwi yakwiva na meso yakuona, Zumbe Mnungu niye ayadamanye yose maidi.

13 Usekuungisa nt'hongo sema unande mkiwa, unde meso nawe nounde ne nk'hande nyingi.

14 Mguzi agamba hiyo yedi, hiyo yedi, mna anahalawa akeduvya kwa kuhunguzilwa diyombe.

15 Kuna zahabu na maiwe mengi ya yombe kulu, mna milomo ikulonga mizungu nicho kint'hu cha yombe kulu.

16 Mnt'hu analaganila hako kumkimaila mtakwiza guha suke yakwe, uyo niye namlihile uyo mtakwiza.

17 Nk'hande ikupatikana kwa udant'hi imwile kwa mnt'hu, mna akajika yanda enga msanga mwo mnomo.

18 Kila mbuli yedi yadamanyika kwa ulangilizi, unaunga kukonga kutowana nk'hondo zungula ulangilizi.

19 Mlulimi akufisa mbuli za kinyele, ivo usekumtimila mnt'hu akulonga uhezi.

20 Akumligita ise hegu nine, ung'azi wo ugima wakwe nouzimwe enga lumuli mwe diziza dititihale.

21 Ukipe usunguze kupatikana, hounde no uvikilwa ko uheelo.

22 Usekugamba, nenilihe uwihi nidamanyilwe. Mgojele Zumbe Mnungu naye naakuyokole.

23 Zumbe aihizwa vitendese na maiwe ya kuhimila yo udant'hi, vihimo vo ubavi havikumwelela.

24 Lugendo lwa mnt'hu lwadimwa ni Zumbe Mnungu, adaha vivihi mnt'hu kumanya sila yakwe mwenye?

25 Ni mtego kwa mnt'hu kulagana kulava kint'hu kwa Zumbe Mnungu naho akajika kufanyanya naho kiya alagane.

26 Seuta mta mzungu awakombaganya waihi, awasengela haheina mbazi.

27 Muye wa mnt'hu ni lumuli lwa Zumbe Mnungu, ayapelemba yose yakefisile mndani mwakwe.

28 Lukunde no uhuwilwa lwamuika seuta hant'hu hedi, kwa sila ya lukunde fumbi dyakwe useuta dyanda na utondowazi.

29 Weduvi wa wabwanga ni ludole lwawe, naho nt'hunyo ya wadala ni fii zina mizungu. 30 Mishenge ikuluma nuwo mti wa kuusa uwihi, milumile ya kufyalikwa yautenda umoyo unde wedi.