1 Mnt'hu ana mbuli nyingi akuzifanyanya zikulawa mwo moyo wakwe, mna uhituzi wo uheelo walawa kwa Zumbe Mnungu.

2 Sila zose za mnt'hu zaoneka kunda zedi hameso hakwe mwenye, mna Zumbe Mnungu niye akuhima kiya mnt'hu akuunga kukidamanya.

3 Ziike kwa Zumbe Mnungu ndima zako zose izo ukudamanya, na kila icho noudamanye nekinde chedi.

4 Zumbe Mnungu aumbaga kila kint'hu enga ivo akuunga yehe mwenye, hata waihi kwaajili ye zuwa dyo usengelo.

5 Zumbe Mnungu aihizwa vitendese na wose wata lubezo, kindedi mnt'hu enga uyo haaswese kusengelwa.

6 Kwa lukunde na uhuwilwa wavu wahauswa, kwa kumvika Zumbe Mnungu want'hu hawakudamanya uwihi.

7 Zumbe Mnungu aneleleswa no lugendo lwa mnt'hu, awatenda hata wank'hondo wakwe wekale kwa utondowazi naye.

8 Ni vedi kupata vint'hu vigeke kwa uhuwilwa kujink'ha ugoli ubindile wingi kwa kuhujila.

9 Mioyo ya want'hu yafanyanya sila zawe, mna Zumbe Mnungu alongoza lugendo lwawe.

10 Seuta alamula kwa kulongozwa ni Mnungu, alava usengelo kwa uwagilwa.

11 Zumbe Mnungu aunga vihimo ne mizani viligane, maiwe yose yo kuhimila mwo mfuko kayadamanya yehe.

12 Maseuta wahiizwa vitendese kudamanya uwihi, kwaviya fumbi dya kiseuta didamanywa kwa sila ya uwagilwa.

13 Seuta amuungisa mnt'hu yudya akulonga kwa uhuwilwa, naho elelwa na mnt'hu yudya akulonga kindedi.

14 Maya ya seuta ni enga mwigala file, mna mnt'hu mta mzungu naaihoze.

15 Kihanga cha seuta kinang'ala kuna ugima, uwedi wakwe ni enga vunde dya fula ya masika.

16 Kupata mzungu ni kwedi kujink'ha zahabu, naho kupata umanyi ni kwedi kujink'ha masawa.

17 Sila ya wahuwilwa ni kukeika hale na uwihi, yehe akuidima sila yakwe, adima wikazi wakwe.

18 Kitugu chalongoela ubanangi, moyo wa kukeduvya walongoela kugwa.

19 Ni vedi kukeseleza na kunda hamwenga na wakiwa, kujink'ha kupangilana vitahigwa na wata lubezo.

20 Yeyose akuzumila mahinizo naagendeele, naho yudya akumhuwila Zumbe Mnungu naavikilwe.

21 Mta mzungu mo moyo etangwa mta umanyi, naho mbuli yedi yawelela want'hu vitendese.

22 Mzungu ni n'choko yo ugima kwa wadya wananawo, mna mbwalasi egala usengelo kwa wabwalasi.

23 Moyo wa mta mzungu wahiniza kulonga ayedi, naho aitenda milosi iyo iungiswe.

24 Mbuli yedi ni enga kivuna, kina mwiile mwo moyo na kuwink'ha mwili ugima.

25 Mnt'hu adaha kuona sila yakwe ni yedi hameso hakwe, mna uheelo wakwe ni sila ya file.

26 Mndima mta sala adamanya ndima kwa kukombatiza, kwaviya sala yakwe yamtenda agendeele.

27 Mnt'hu aihile anyanyika yaihile, yadya akulonga ni enga moto ukoka.

28 Mnt'hu mwiihi egala nk'humbizi,

Mteti awapanga wambuya.

29 Mnt'hu mwiihi amluvya miyawe, na kumlongoza mwe zisila zihile.

30 Wakukonyeza meso yawe waunga wadamanye uwihi, wakugonjeza milomo yawe wakeika lumwe kudamanya uwihi.

31 Kunda na fii za udala ni taji yo ukulu, yapatikana kwa wikazi wa uhuwilwa.

32 Heena maya ni ywedi kujink'ha yudya akuutaha umzi, akuuudaha moyo wakwe ni ywedi kujink'ha akuutaha mzi.

33 Kula yatoigwa kwa kinyele, mna kila ulamuzi walawa kwa Zumbe Mnungu.