1 Unekala no kudya nk'hande hamwenga na kilongozi, ukaulise kugamba una kilongozi, 2 usekuungisa ukudya, uneva weye wi mhank'hu, 3 usekuungisa nk'hande zakwe zedi, kwaviya nk'hande izo ni za nyambi.

4 Uneva una mzungu ukint'hile, usekwangadika kuzungula ugoli, 5 kufinya na kugubula ugoli wahalawa, vanda enga upata mawawa.

6 Usekudya nk'hande ya mnt'hu mgila, usekuungisa nk'hande zakwe zo kumunk'hilwa, 7 kwaviya mwo umoyo wakwe awaza icho adile, Naakugambile, "Dya naho nywa." Mna mwo moyo wakwe hehamwenga nawe. 8 Noutahike kiya udile, naho milosi yako ya kumtogola neinde kuyaza haheina kint'hu.

9 Usekulonga mbuli yako ha mhezi, kwaviya naabele mzungu we zimbuli zako.

10 Usekuusa kiwalo mwo mhaka wa kale, naho usekwingila mwe zink'honde za wana nk'hiwa, 11 kwaviya Mnungu Mkombola ni mta udahi, naye naaugombele uwagilwa wawe kulawa mwako.

12 Timila moyo wako utegeleze mahinizo, na magutwi yako utegeleze umanyi.

13 Usekuleka kumkanya mwana, kwaviya unamkanya kwa mshenge haabanike, 14 unamkanya kwa mshenge, nauyokole wikazi wakwe kulawa ko mnyongomela.

15 Mwanangu uneva moyo wako una mzungu, ivo moyo wangu noundilise ne kinyemi, 16 moyo wangu nowange, umwo mnomo wako unalonga mbuli zo uwagilwa.

17 Moyo wako usekuwaonela finju wata wavu, mna gendeela kumvika Zumbe Mnungu mazuwa yose, 18 kindedi kuna kawiilo mwo mazuwa yakwiza kwajili yako, naho kawiilo dyako hedilemelwe.

19 Tegeleza mwanangu unde no mzungu, ika moyo wako mwe sila yo uwagilwa, 20 usekunda yumwenga mwa awo wakukolwa, hegu wahank'hu wakuungisa nyama, 21 kwaviya wakukolwa na wahank'hu nawande wakiwa, wasokezi nawavale suke zisakale.

22 Mtegeleze iso, naho usekumbela nyokwe umwo ananda kadalahala, 23 gula ukindedi naho usekuutaga, pata mzungu na mahinizo no umanyi, 24 ise dya mta uwagilwa ana kinyemi kikulu, naye amweleke mwana mta mzungu naande na kinyemi, 25 welesi wako nawande ne kinyemi, nyokwe akweleke ange.

26 Mwanangu nitegeleze kwa wengele, utimile nyendo zo wikazi wangu, 27 kwaviya pamp'he ni bome tali, na mvele mtakwiza ni enga sima finyu, 28 yehe anyatila enga mbavi, niye akuwatenda wagosi wengi wasekunda wahuwilwa.

29 Ni ani akugutila? Ni ani mta kinyulu? Ni ani mta nk'humbizi? Ni ani wakulabila? Ni ani alumizwe hahena kudamanya mbuli yoyose? Niani wata meso yenk'hundu? 30 Ni wadya wakwikala hakunywegwa mp'hombe, awo wakugenda kuzungula divai ihanganywe. 31 Usekuiungisa divai hata uneva ink'hundu, hata uneva yamelemeta mwe kikombe, na kuseela mp'halahole umwo ukainywa. 32 Mwo uheelo yaluma enga nyoka, yoka enga satu dina usungu. 33 Meso yako nayaone maluwe luwe, moyo wako nao noulave mbuli zagile. 34 Nounde enga mnt'hu akugona hagatigati ye bahali, hegu enga mnt'hu akugona mnanga ye meli. 35 Nougambe, Wanitowa mna hilumile, wanitowa mna hivile, Neninuke ini, vileke nikolwe naho?