1 Mwanangu usekujala milosi yangu naho tozesa malagizo yangu. 2 Zitimile sigilizi zangu weye nawe nowikalise, uyamile mahinizo yangu enga kint'hu kikwamiliswa. 3 Mwo lupisi lwose uyakumbukile mahinizo yangu, na uyaike mawandiko yangu mwo moyo wako. 4 Ulele mzungu enga lumbudyo, umanyi nawo enga nduguyo ywa hagihi. 5 Nevikwamile hale na mvele mhabwasi, nevikwenege na milosi inamwiile ya mvele hi mhuwilwa.

6 Kwe nyumba yangu nasungilaga kuse kombokela mwe didilisha, 7 nawaonaga wabwanga wabindile wingi wahezi, na yumwenga ywawe andilisaga mhezi. 8 Uyo andaga akagenda mwe sila iidya, hagihi na hadya nekekala mvele, ivo niyo atoza isila ya kuita kwa mvele uyo, 9 yandaga mwo lupisi lwa kisingi, kilo chandaga kiingila, 10 mvele uyo abwilanaga na uyo mbwanga, avalaga enga mhabwasi naho akanda na mzungu wakwe. 11 Andaga mvele mta lwasu naho mnk'hani, naho hakwikala hasi. 12 Mwe zisila hegu mwe magwilo, na nt'hendelo zose anyatila wagosi. 13 Amkumbatilaga mbwanga uyo na kumnonela, na kwa milosi inamwiile na kumgamba, 14 "Hilava malavo yangu ya mwivano, na dyelo ino hikint'hiza lagano dyangu. 15 Nivo vilekile nifose nize husingile, hikuzungulisa mna hikupata. 16 Hikunk'hunta vedi lusazi lwangu, kwa mashuka ya langi ya kitani kulawa Misili ina midolonyo. 17 Higela mhemp'he na manemane, udi na mdalasini. 18 So kigone mpaka mtondo, wize kikebwedeze vedi. 19 Mgosi wangu hehali mwe nyumba, kaita utafi wa hale. 20 Kaguha dunya dya matundu, haasunguse kuuya kaya mpaka mwezi ukusila." 21 Amluvyaga kwa milosi inamwiile ya kumhembeleza, mbwanga uyo niyo aluvigwa kwa milosi iiyo. 22 Aaho amtimilaga mvele uyo enga ng'ombe ikuita ko kuchinjwa, enga kapala kakugwilwa mwo mtego, 23 habunk'hulaga kugamba iyo neibanange wikazi wakwe, mpaka abula enga kalasigwa msale mwo moyo wakwe, naho andaga enga dege dikuhinga mwo mtego hahena kumanya kugamba neibange wikazi wakwe.

24 Haluse wanangu nitegelezeni, naho mwive milosi yangu. 25 Use kuzumila moyo wako kumtimila mvele uyo, hegu mnase komboka mwe zisila zakwe. 26 Kwaviya kawagwesa wagosi wabindile wingi na kuwachinja. 27 Nyumba yakwe ni sila ya kuita kwe vikuta naho sila ni ya kuhinga kwo mnyongomela.