1 Usekukeduvya kwajili ya luvi, kwaviya hukumanya kikuunga kilaile dyelo.

2 Waleke want'hu watuhu wakutogole, kujink'ha mnomo wako weye mwenye, mna mta kwiza naakutogole, mna weye usekukeduvya.

3 Iwe dizama, msanga nawo ni nt'wika, mna kugeligwa maya na mhezi kuzama kujink'ha ivo vose viidi.

4 Maya yalumiza naho yamola, mna niani akudaha kufinyiliza wivu?

5 Ni vedi mnt'hu akukanye pwilili, kujink'ha lukunde lwa kinyele.

6 Kulumizwa ni mbuyayo ni uhuwilwa, mna kilagiso cha lukunde kulawa kwa mnk'hondo ni udant'hi.

7 Yehe egute hata uki alemela kudya, mna kwa mta sala hata adye kint'hu kisungu kwake ni kimwile.

8 Mnt'hu akwangadika hale na kwakwe ni enga dege dilekile hale chaila chakwe.

9 Mavuta na mhep'he wedi na ubani yegala kinyemi mwo moyo, ni enga mwile ukulawa mwo ulangilizi wa kindedi.

10 Usekuwajala mbuyazo hegu wambuyaye ya iso, unapata makunt'ho usekugulukila kwa nduguyo, ni vedi kwa mbuyayo ehagihi kujink'ha nduguyo ehale.

11 Mwanangu unde na mzungu vileke nipate kinyemi mwo moyo wangu, name heniswese dya kuhitula kwa yeyose akunibela.

12 Mta mzungu ayaona yaihile na kukefisa, mna mhezi agendeela hameso na kulumila.

13 Mnt'hu analaganila hako kumkimaila mta kwiza, guha suke yakwe, naho guha kint'hu kwa akumkimaila mta kwiza.

14 Mnt'hu akumvikila mbuyaye kwa izwi kulu kilokilo, neimanyike kugamba aunga amligite.

15 Mvele mta nk'humbizi ni enga matwent'we ye fula heyekusila, 16 kumkindila yehe ni enga kuikindila mp'heho hegu kutoza mavuta ya mazi mwe kifumba cha mkono.

17 Kilama chanola kilama, iviya iviya mnt'hu ahinizwa ni miyawe.

18 Yehe akwamila mti naadye matunda yakwe, na akumdamanyila ndima mkulu ywakwe neink'higwe nt'hunyo.

19 Enga kihanga ivo kikuoneka mwa mazi, nivo vili moyo wa mnt'hu ukumlagisa ivo eli.

20 Komnyongomela na ubanangi havikwiguta, iviya iviya na meso ya want'hu hayakwiguta.

21 Uwedi wa masawa hegu zahabu vahimwa no moto, mnt'hu naye ahimwa viligane ne zint'hogola zakwe.

22 Hata una mtwanga mhezi mwe dituli, naho hata una mtwanga na mtoho enga uhule, hohause uhezi wakwe.

23 Dima vedi mifugwa yako, kaulisa ludimo lwako, 24 kwaviya ugoli hakwikala ulo na ulo, naho nt'hunyo haikwikala vyeleko vose. 25 Kant'ha mani yanyaile uku mani mahya yakasuka, na mani kulawa mwo mnima yaduganywa, 26 ngoto nawakwink'he sufu kwajili ya mavalo, noutage mbuzi na kukeguila nk'honde. 27 Noupate mele kulawa mwe zimbuzi ikukint'ha weye hamwenga ne mp'huga yako, na kwajili ya wandima wako wa kivele.