1 Mnt'hu akukeika hale na weyawe azungula mbuli zakwe mwenye, naho aihizwa akenk'higwa ulangilizi wowose wedi.

2 Mhezi hakuungisa umanyi, mna anda na kinyemi kubwelekeza fanyanyi zakwe mwenye.

3 Uwihi ukeza lubezo nalo lweza, hamwenga ne zisoni kweza ukuhuza.

4 Mbuli akulonga mnt'hu ni enga mazi matali ya bahali, ni enga nc'hoko kakuseleza kazuto ka mzungu.

5 Hiyo vedi kumwink'ha uwagilwa mnt'hu mwavu, na kumnyima uwagilwa mnt'hu mhuwila.

6 Yadya akulonga mbwalasi yegala nk'humbizi, naho kila icho akulonga chegala makunt'ho.

7 Mnomo wa mhezi wambananga mwenye, milosi yakwe ni mtego kwa moyo wakwe.

8 Mbuli ya mnt'hu msongezi ni enga nk'hande imwile, iyo ikuseela hamwenga kwe inda.

9 Mnt'hu hekudamanya ndima, ni enga mbanangi.

10 Zina dya Zumbe Mnungu ni gomela ditogile, wata uwagilwa wadigulukila wasekupatwa ni maihi.

11 Fanyanyi za want'hu wagoli ni kugamba ugoli wawe wawadima enga gomela dyawe ditogile dikuzunguluka mzi.

12 Mta moyo wa wefenyi wegala ubanangi, mna kukeseleza kwegala nt'hunyo.

13 Yehe akuhitula umwo akanda akei kutegeleza, uyo ni uhezi naho ni mbuli ya soni.

14 Muye wo mnt'hu wadaha kufinyiliza unyonge, mna uneva moyo ufa chevu wadaha vivihi kufinyiliza?

15 Mnt'hu mta ubala akegaila umanyi, magutwi ya mta mzungu uzungula umanyi.

16 Geleko dyamkomoela sila yudya akulava, nadyo dyamwigala mnt'hu ha wakulu.

17 Ywa nk'hongo kwe kitala naaoneke kunda mkindedi, mpaka yudya akumhiga akonge kumuuza mbuli.

18 Kutowa kula kwabinda uhigani, kwalava ulamuzi mwa wakulu wakuhigana.

19 Ndugu aihizwe ni mdala kuzumila kulamulwa kujink'ha mzi wa gomela, naho yudya akuhigana ni enga nk'hili ivugalwe na madanga.

20 Milosi yedi ya mzungu yamtende mnt'hu egute, neegute ulozo uwo ukulawa mwe milomo yakwe.

21 File no ugima vi mwo udahi wo lulimi lwa mnt'hu, nawo wakuunga kuudamanyila ndima nawadye matunda yakwe.

22 Akupata mkaziwe apata kint'hu chedi, naye apata geleko dyedi kulawa kwa Zumbe Mnungu.

23 Mnt'hu mkiwa alombeza kwa kukeseleza, mna mgoli ahitula kwa luhahila.

24 Mnt'hu mta wambuya wengi wadaha kumbananga, mna weyuko wambuya wahuwila kujink'ha ndugu.