1 Tegelezeni mzungu wetanga,

umanyi wakweza izwi dyakwe.

2 Mnanga mwe vigulu hagihi ne sila,

mwe sila mp'handa naho akimalaga.

3 Hagihi ne zink'hili zo mwingilo wo mzi,

hant'hu wakwingiila want'hu awetanga kwa izwi kulu akagamba:

4 "Nyuwe want'hu wose nawetangani,

lwitango lwangu ni kwaajili ya kuwalalika want'hu wose.

5 Nyuwe wahezi kehinizeni kunda na umanyi,

tegelezeni kwa wengele nyuwe wahezi.

6 Tegelezeseni kwaviya icho huunga nilonge ni kint'hu chedi,

mwe milomo yangu nomlawe milosi ya kindedi.

7 Mwe milomo yangu nenilonge ikindedi du,

uwihi ni ihizo mwe milomo yangu.

8 Milosi yangu iyo hulonga ni kindedi,

udant'hi ni uwihi mwe milongo yangu.

9 Kwa mnt'hu akubunk'hula kila kint'hu chedi,

kwa mta mzungu wose ni wedi.

10 Sagula mahinizo yangu kujink'ha masawa,

na umanyi kujink'ha zahabu yedi."

11 "Miye mzungu ni ywedi kujink'ha iwe dya yombe,

chochose noumunk'hilwe nacho hakikudaha kuligana na miye.

12 Miye ni mzungu nekala hamwenga na umanyi na ubala.

13 Kumvika Zumbe Mnungu ni kuihiwa ni uwihi,

naihiwa na kitugu na kukeduvya na wikazi wiihile,

naho naihiwa na milosi ihile.

14 Nina udahi wa kulangiliza naho nna mzungu,

nna umanyi na ludole.

15 Kwa wambizi wangu maseuta walongoza,

na vilongozi waika sigilizi zedi.

16 Kwa wambizi wangu vilongozi walongoza,

iviya iviya wakulu na walamuzi.

17 Nawaungisa wadya wakuniungisa,

wakunizungulisa kwa kukombeka nawanipate.

18 Ugoli na nt'hunyo vi hangu,

ugoli wa mazuwa yose na uvikilwa.

19 Matunda yangu ni yedi kujink'ha zahabu yedi,

upati wangu wahuma upati udya wa masawa yedi.

20 Nagenda mwe sila yo uwagilwa,

natimila sila ya kindedi.

21 Miye nawenk'ha ugoli wadya wakuniunga,

namemeza vindolo mwe zinyumba zawe wadya wakuniungisa."

22 "Zumbe Mnungu aniumbaga nk'hongo mwe zi ndima zakwe,

umwo andaga hadamanye kint'hu chochose.

23 Naumbwagwa nk'hongo mwo lupisi,

nandaga aaho uku hainati isi kukonga.

24 Nelekagwa kukanda nk'hongelo ye bahali ikanda hainati,

kukanda hakunati nch'oko zose kukonga kulava mazi."

25 Umwo milima ikanda hainati kuikwa,

na vigulu kuikwa hant'hu hakwe, miye nandaga aaho,

26 Mnungu akanda hanati kuumba isi,

hegu sanga ya nk'hongo ye isi.

27 Nandaga aho kukongela aho mbingu yaikagwa,

umwo atoaga mihaka mwe bahali.

28 Mwo kukint'hiza mavunde mwo ulanga,

umwo azidamanya nch'oko za bahali.

29 Umwo aikaga mihaka we bahali,

amazi sema yanabanange miko yakwe,

naho andaga kaika nk'hongelo ye isi.

30 Nandaga hamwenga nae enga mmanyi ywedi,

nandaga kinyemi chakwe mazuwa yose,

nangaga hakwe mazuwa yose,

31 umwo nandaga na kinyemi ne isi hamwenga na want'hu wakwe,

na kwelelwa kunda hamwenga na want'hu wakwe.

32 "Haluse wanangu nitegelezeni,

wavikilwa wadya wakutimila sila zangu.

33 Tegelezeni mahinizo mpate mzungu,

hegu mnase kuyalemela.

34 Ni vedi kwa mnt'hu yudya akunitegeleza,

akagojela uvikilwa wangu,

akucheleza akanilombeza.

35 Akunipata miye kapata ugima,

naho naande kauungiswa ni Zumbe Mnungu.

36 Mna hekuniunga miye naande kakebananga yehe mwenye,

wose wakuniihiya waungasa kubanika."