1 Ngelo izi za Sulemani mwana kilume ywa Daudi seuta ywa Izilaeli.

2 Ngelo izi zawenk'haga want'hu mzungu na wogohi, naho zawatenda wamanye mbuli zedi. 3 Ngelo izi zawatenda kunda mzungu na ukindedi na kudamanya yakwelela. 4 Zawenk'ha umanyi wadya heweina ubala, wabwanga nawo, wapata umanyi vileke wekale kwa wengele. 5 Mta mzungu ategeleze na kongezela umanyi wakwe, na mta ubala apate ulangilizi, 6 Mnt'hu amanye mbuli ze mizungu ne miliganyizo na mbuli za wata umanyi na ngelo.

7 Kumvika Zumbe Mnungu ni nk'hongelo ya umanyi, mna wahezi waubela mzungu una ubala.

8 Mwanangu tegeleza makanyo ya iso, naho use kuleka mahinizo ya nyokwe. 9 Ayo nayande enga taji ina mahambo mwo mtwi wako, enga mkufu ukuwagila wa mwe singo yako.

10 Mwanangu unase kuzumila kuluvigwa ni wata wavu naho use kuwazumila. 11 Wakagamba, "Kite kimnyatile mnt'hu na kumkoma! Kite kikawatowe heweena masa. 12 Nekiwamele wakanda wagima enga vikuta, wande enga wadya wakuhubugila mwo mnyongomela! 13 Nekipate ugoli wose wa yombe, nyumba zetu nezimeme vitahigwe! 14 Soo kinde hamwenga, vose nekipate na nekipangilane."

15 Weye mwanangu use kulongozana nawo, kindila kiga chako kisekutimilana nawo. 16 Kwaviya woho waunga kudamanya wavu, wasunguza kwitila sakame. 17 Hiyo kint'hu kwinika mtengo uku dege dikakaula, 18 mna want'hu awa wanyatila na kukegwila woho wenye, wenika mtego wa kukegwila mioyo yawe wenye. 19 Nivo zili sila kwa wadya wakupata ugoli kwa uhoki, kuhujila kwawe kwawabananga wakwikala kwa uwihi.

20 Mizungu yetangana kwa izwi mwe sila, naho yabwelekeza mwa magwilo, 21 yetanga mwe midugano mikulu ya want'hu mwe mingiilo, mwo mzi namo yabwelekeza mbuli zakwe.

22 "Nyuwe wahezi! Nomnde wahezi kubula ini? Wata lubezo nawande na kinyemi mwo lubezo lwawe na wahezi kuuihiya mzungu kubula ini? 23 Tegelezeni makanyo yangu, neniwenk'heni zifanyanyi zangu, naho neniwalagiseni mbuli zangu. 24 Kwaviya hiwetangani naho niyo mwalemela kunitegeleza, nehiwachuluilani mkono wangu hawetangani mna hehali aukaule. 25 Niyo mwabela ulangilizi wose, naho hamzumile makanyo yangu, 26 ivo name neniwasekeni mwa makunt'ho yenu, neniwabeleni umwo mkeziilwa ni wogofi, 27 umwo wogofi ukawabwiilani enga mjubwaniso, makunt'ho yenyu umwo yanaweziilani enga kisingisa, umwo masulumizo na kiyangayanga vikawapata. 28 Aho naho nomniitange mna miye heniwategeleze, nomnizungule kwa kukombeka mna homnipate. 29 Kwaviya nomkauihia umanyi, naho walemelaga kumvika Zumbe Mnungu. 30 Ivo mwalemelaga kutegeleza ulangilizi wangu, niyo naho mwayabela makanyo yangu yose, 31 ivo nompate kiya muungigwe mpate naho nomsulumile kwa yadya mkuunga mdamanye. 32 Kwaviya wahezi wakekoma kwa kulemela mzungu, heweina mzungu nawabanike kwa kukehuwila woho wenye. 33 Mna kila yudya nanitegeleze neekale kwa utondowazi, neekale haheina kogoha yaihile."