1 Mwanangu tegeleza mzungu wangu, naho wive umanyi wangu 2 Naho noudahe kunda na mzungu, na milomo yako inde na umanyi. 3 Milosi ya pamp'he inamwiile enga uki, kiya akulonga ni chedi kujink'ha mavuta ya mzaituni, 4 mna ko uheelo yanda isungu enga sungwi naho yasenga enga sime. 5 Viga vakwe vahinga mwo kubanika, nk'hacho zakwe zagendeela kwe kikuta. 6 Yehe hakuikaula sila yo ugima, sila zakwe ni za kwangadika du, mna hamanyize.

7 Haluse nyuwe wanangu nitegelezeni, naho mse kujala ulosi wangu. 8 Sila zenyu zinde hale na yehe, naho mse kunda hagihi ne nyumba yakwe. 9 Use kuwenk'ha watuhu nt'hunyo yako, na waihile wakukome weye. 10 Wata kwiza sema wanakeiguse mwo ugoli wako, na ndima zako zikanda mwe nyumba za want'hu watuhu. 11 Mwa mazuwa yako ya uheelo wikazi wako nouhongeze, umwo kudalahala kwako. 12 Aho nougambe, "Ivo niihiye makanyo, na kubela kufank'hilwa mwo moyo wangu? 13 Hiitegeleze izwi dya wahinizi wangu, hegu kuweva wahinizi wangu. 14 Haluse nihagihi na kwingila soni, na kuswesa nt'hunyo kwa want'hu."

15 Mkaziwo ni enga sima dya mazi yedi naho unywe mazi ye disima dyako mwenye. 16 Nii mazi ye nch'oko zako uyetile hale, na vizuto va mazi mwe sila? 17 Ayo uyaleke yande yako mwenye, usekuhanganyila na mnt'hu. 18 Unde na kinyemi kwa mkaziwo, naho welelwe ni mkaziwo uyo umlombile. 19 Ni ywedi ahomboele, uwedi wakwe welela kila lupisi, naho kwa lukunde lwakwe welelwe mazuwa yose. 20 Mwanangu nii kukailwa ni mvele mhabwasi? Naho nii umkumbatile mvele wa mwenye? 21 Kwaviya sila zo mnt'hu zi mwazi ha Zumbe Mnungu, naho yehe ahima yadya yose udamanye. 22 Mnt'hu mwavu agwilwa ni wavu wakwe mwenye, Naho agwilwa mwo udamanyi wakwe wiihile. 23 Naabanike uyo kwa kuswesa makanyo, naage kwa uhezi wakwe mkulu.