1 Mwanangu unazumila mbuli zangu, na kuyatoza malagizo yangu. 2 Utegelezese vint'hu va mzungu, na kuonyekeza umoyo wako upate ubala. 3 Ivo itanga wink'higwe mzungu, ulombezese wink'higwe na ubala, 4 unazungula umanyi enga masawa, na kuizungula enga kindolo kikefisile. 5 Uneva noudamanye ivo noumanye vo kumvika Zumbe Mnungu, no kummanya Mnungu. 6 Kwaviya Zumbe Mnungu awenk'ha want'hu mzungu mwe milomo yakwe mwalawa fanyanyi zedi na mzungu. 7 Awenk'ha wambizi wata miyoyo yedi, naho yehe awamila want'hu wana uhuwilwa. 8 Ayamila miyoyo ya want'hu wata uwedi, na kuzidima sila za wahuwilwa.

9 Unanitegeleza noumanye uwedi no uwagilwa, noumanye kuipanga sila yedi na iihile. 10 Kwaviya umanyi nounde mwo moyo wako, na mzungu nouwagilwe mwo moyo wako. 11 Mzungu noukwamile, umanyi nawo noukudime vedi. 12 Nevikuike hale na sila ziihile, na want'hu wakulonga mbuli zi kwazaganya. 13 Want'hu wakuzileka sila zedi, vileke watimile sila zawe ziihile, 14 want'hu wakudamanya uwihi na kwelelwa na mbuli zawe zo uwihi, 15 want'hu awo waganika naho sila zawe hazikuhuilwa.

16 Mzungu noukutende kukenega na wavele wahabwasi, mvele mhabwasi mta milosi yedi, 17 mvele akumleka mgosiwe ywo ubwanga wakwe, uyo kajala lagano dyakwe aikaga ha Zumbe Mnungu ywakwe. 18 Nyumba yakwe zalongoza want'hu kwo kubanika, sila zakwe nazo zawegala kwe isi ya wabanike. 19 Yeyose naamtimile mvele uyo haauye naho, sila yo ugima wakwe nayo heiuye. 20 Kwaivo waungigwa kutimila mliganyizo wa want'hu wedi na kutimila migendele ya want'hu wahuwilwa. 21 Kwaviya want'hu wedi nawenk'hwe isi, na wahuwilwa nawekalise mwe isi. 22 Mna waihile nawahauswe mwe isi, na wata finju nawahauswe uumwo.