1 Mwanangu use kujala mahinizo yangu, mna ukumbukile malagizo yangu mwo moyo wako. 2 Kwaviya mahinizo yangu naya kongezele wikazi mtali na upati. 3 Use kuleka kutimila sigilizi na uhuwilwa uhalawe mwako, uvitozese naho viwandikwe mwo moyo wako. 4 Unadamanya ivo nouzumilwe na kutunywa ha Zumbe Mnungu na ha want'hu.

5 Mhuwile Zumbe Mnungu kwa moyo wako wose, use kuhuwila ubala wako mwenye. 6 Umkumbukile Zumbe Mnungu mwe mbuli zako zose, yehe naye naakwamile mwe zisila zako zose. 7 Use kukeona mwenye kunda na mzungu kujink'ha ivo wili, weye mwogohe Zumbe Mnungu na kwikala hale no uwihi, 8 uneva unatenda ivo, noupate ugima mwo mwili wako, na ludole mwa mavuha yako. 9 Mtunye Zumbe Mnungu kwa ugoli wako, na kwa ulozo wako wa nk'hongo, 10 unatenda ivo magulu yako nayamemese nk'hande, mabiga yako nayo nayameme divai mp'hya.

11 Mwanangu use kubela makanyo ya Zumbe Mnungu, naho usekuihia umwo akakufank'hila. 12 Kwaviya Zumbe Mnungu amkanya yudya akumuunga, enga ivo tate akumfank'hila mwanawe akwelelwa naye. 13 Ni vedi kwa mnt'hu akubunk'hula umanyi na mnt'hu yudya akupata mzungu, 14 kwaviya mzungu ni wedi kujink'ha masawa, ina upati kujink'ha zahabu. 15 Mzungu una yombe kujink'ha maiwe ya yombe, hakihali kikukwelela kikudaha kuligana nacho. 16 Mwo mkono wakwe wo kulume naakutende wikalise, na kwo mkono wakwe wo kumoso nakwink'he ugoli na nt'hunyo. 17 Sila zakwe ni zedi, zose ni sila zo utondowazi. 18 Mzungu ni mti wo ugima kwa wose wakuukumbatila, nawavikilwe wose wakuunga wautoze.

19 Zumbe Mnungu aumbaga si kwa sila mzungu wakwe,

kwa umanyi aikaga ulanga hant'hu hakwe.

20 Kombokela mzungu wakwe n'choko yalavaga mazi,

mavunde nayo niyo yadondomosa mnyuzu.

21 Mwanangu uyatozese ulamuzi mzungu na wengele, usekuzumila vimlawe mwako, 22 ivo nevikwink'he ugima naho ni mahambo yedi mwe singo yako. 23 Aho noudahe kugenda vedi, naho kiga chako hekikobadike. 24 Umwo ukatambaala howogohe, naho ukagona noupate nt'hongo zina mwiile. 25 Unase kogoha umwo unatiswa, hegu makunt'ho kulawa kwa waihi. 26 kwaviya Zumbe Mnungu niye naakwamile, naakuhonye sema unagwilwe mwo mtego.

27 Use kumnyima wambizi mnt'hu akuunga wambizi, ikanda una udahi wa kudamanya ivo. 28 Use kumgamba myawo aite du mpaka luvi, ikanda weye wadaha kumwink'ha icho akuunga dyelo. 29 Use kuika mzungu wiihile mwa miyawo, akwikala hagihi na weye uku akakuhuwila weye haheina wogohi. 30 Use kugomba na mnt'hu haheina chochose cho kugombela, ikanda hakubanange chochose. 31 Usekumuonela finju mnt'hu mta nk'humbizi hegu kutimila migendele yakwe. 32 Kwaviya maihi ni ihizo kwa Zumbe Mnungu, mna yehe awatenda wambwiyaze wadya wata moyo wedi. 33 Zumbe Mnungu awaligita nyumba za want'hu waihi, mna awavikila want'hu wedi mwo wikazi wawe. 34 Yehe awabela wata lubezo, mna awenk'ha uwedi want'hu wakukeseleza. 35 Wata mzungu nawapate nt'hunyo, mna wahezi nawaone soni.