1 Ni vedi kudya mikate heina kint'hu kwa utondowazi, kujink'ha kudya fugo mwe nyumba ina kumbizi.

2 Mtumwa mta mzungu naaguhe hant'hu ha mwana mbwalasi wa mgoli, naapate hant'hu ha ukipe enga yumwenga mwe mp'huga iyo.

3 Zahabu yedi hegu masawa yagezwa kwa moto, mna Zumbe Mnungu niye akuhima mioyo ya want'hu.

4 Mnt'hu muihi ategeleza mbuli ziihile, mdant'hi ategeleza wadya wakulonga lulimi.

5 Akumbela mkiwa kamjala Mnungu wakwe, akuionela kinyemi makunt'ho ya weyawe haaswese kusengelwa.

6 Wadala wakeduvila wezukulu wawe, wana nawo wakeduvila welesi wawe.

7 Milosi yedi haikulongwa ni wabwalasi, iviyaiviya mbuli zo udant'hi zisekulongwa ni kilongozi.

8 Want'hu waona yudya akulava matundu ya soni ni enga usai kwa uyo akuyalava, kila icho akudamanya mnt'hu chalaila enga ivo akuuga.

9 Kila uyo ukumuusila mbuyaye masa yakwe akuza lukunde, mna akuyakumbusa masa akeika hale na mbuyaye.

10 Kanyo dimwenga dya mnt'hu mta umanyi ni dyedi, kujink'ha makunt'ho gana kwa mnt'hu mhezi.

11 Want'hu wavu wakeika hale na Mnungu, mwigala ulosi heiina mbazi naatumwe kwawe.

12 Ni vedi kubwilana na kala vele dikwitangwa simba dihokigwe wanawe, kujink'ha kubwilana na mbwalasi mwo ubwalasi wakwe.

13 Uneva mnt'hu naalihize yaihile kwa ayedi, yaihile hayauswe mwe nyumba yakwe.

14 Nk'hongelo ya kumbizi ni enga kuponk'hola mazi mwe dikawa, leka nk'humbizi umwo ikanda ikei kulaila.

15 Akugamba mta uwagilwa hana uwagilwa na yudya akugamba heiina uwagilwa ana uwagilwa, yose ayo maidi ni ihizo kwa Zumbe Mnungu.

16 Nii wahezi wande na matundu yakulihila umanyi, mna uyo mwenye akulihilwa hakuunga kupata mzungu?

17 Mbuya ywa kindedi ni mhuwila mazuwa yose, ndugu kelekwa ambize mwo lupisi lwa makunt'ho.

18 Hiyo vedi kumkimaila miyawo kokukopa, na kumkimaila mnt'hu mtuhu.

19 Mnt'hu akuunga nk'humbizi aunga wavu, akuketogola akezunguila ubanangi.

20 Mta moyo mdala haapate ayedi, naho akulonga udant'hi naapate makunt'ho.

21 Akweleka mwana mbwalasi akegaila kinyulu mwenye, na tate ywo mwana mbwalasi hakudaha kunda na kinyemi.

22 Moyo usangale ni miti yedi, mna moyo una kinyulu wanyaza mavuha.

23 Mnt'hu mwavu ahokela matundu ya soni, vileke azaganye uwagilwa.

24 Mmanyi ukaula mzungu, mna mbwalasi aungisa kila kint'hu mwe isi.

25 Mwana mbwalasi egala kinyulu kwa ise, na usungu kwa nine amweleke.

26 Hiyo vedi kumsengela mnt'hu haheina masa, naho hiyo vedi kuwatowa heweina masa kwa uhuwilwa wawe.

27 Mnt'hu hekulongesa ana umanyi, naho mnt'hu mjalamu ni mta ubala.

28 Hata mbwalasi ananyamala aoneka ana mzungu, anagubika mnomo wakwe aoneka kunda mta umanyi.