1 Mvele mta mzungu aizenga inyumba yakwe, mna mhezi aimola inyumba yakwe mwenye.

2 Mta lugendo lwedi amvika Zumbe Mnungu, mna mwiihi ambela Mnungu.

3 Mhezi akuketugula yehe mwenye asengelwa kwa mbuli zakwe za kihezi, mna mta mzungu amilwa ni ulosi wakwe.

4 Haheina ng'ombe zikulima, madewa nayande heyeina kint'hu, ulozo mwingi wapatikana kwa ludole lwa ng'ombe zikulima.

5 Muwona mkindedi hakulonga mlulimi, mna hekuhuwilwa alonga lulimi.

6 Mta lubezo azungula mzungu naho hakuupata, mna mta ubala apata umanyi kwa uhufu.

7 Wikale hale na mnt'hu mhezi, kwaviya houpate mzungu wedi.

8 Mzungu wa mnt'hu mta mzungu ni kumanya sila zakwe, mna uhezi wa wahezi wawadant'ha woho wenye.

9 Wahezi wasekela wavu, mna uwedi waunga kulekelwa wavu wawe.

10 Kila mnt'hu amanya usungu wakwe mwenye. Hahali yeyose akudaha kunda na weye mwe aya.

11 Nyumba ya mnt'hu mwiihi neibanangwe, mna ya mnt'hu ywedi neitogezwe.

12 Iyuko sila ikuoneka kunda yedi kwa mnt'hu mna ko uheelo wakwe yamwigala ko kubanika.

13 Kinyulu chadaha kukefisa mwe ziseko, mna kinyemi kina halawa, kikwiza ni kinyulu.

14 Heweena mhuwi nawabanangwe kwajili ye zisila zawe, na mnt'hu ywedi nenk'higwe nt'hunyo kwajili ye sila yakwe.

15 Mhezi ahuwila kila kint'hu naagambilwe, mna mnt'hu mta mzungu anda kufanyanya sila yakwe.

16 Mnt'hu ywedi amvika Zumbe na kukenega na yaihile, mna mhezi aihiwa kwa uhezi wakwe.

17 Mnt'hu akusunguza kuihiwa adamanya mbuli zo uhezi, mna mnt'hu mta nyambi hakuungwa.

18 Wahezi wanda wakipe mwo uhezi, mna wata mzungu wavalwa nt'hunyo yo umanyi.

19 Want'hu waihile nawafike madi ha want'hu wedi, want'hu waihile nawafunamize vihanga vawe hasi mwa want'hu wata uwedi. 20 Hahali akumuunga mkiwa, naho hata na wambuyaze, mna mgoli ana wambuya wengi.

21 Akumbela miyawe adamanya wavu, mna kavikilwa yudya akuwambiza mkiwa.

22 Akuika mzungu wiihile naage, mna akuika mzungu wedi neenk'higwe lukunde holukusila hamwenga na uhuwilwa.

23 Kukombatiza kwa kila ndima kwegala upati, mna simulizi heziina kint'hu zegala ukiwa.

24 Ugoli ni nt'hunyo ya wata mzungu, mna uhezi wegala kwo wahezi ukutendesa.

25 Muona ywa kindedi ayokola wikazi wakwe, mna muona wo kulonga lulimi ni msezengi.

26 Akumvika Zumbe Mnungu ana gomela dyedi, naho naande unyilikilo wa wanawe.

27 Kumvika Zumbe Mnungu ni nc'hoko zo ugima, yamtenda mnt'hu akenege na mitego yo kubanika.

28 Nt'hunyo ya seuta ni kunda na want'hu wengi, mna haheina want'hu ukulu nounde howiina kint'hu.

29 Mnt'hu heena maya yatendese naande na umanyi mkulu, mna akusunguza kuihiwa agenyeza uhezi.

30 Utondowazi mwo moyo wamwink'ha mnt'hu ugima, mna finju yatenda mavuha yaole.

31 Akumhujila mkiwa amhomola Muumbi ywakwe, mna akumuonela mbazi mkiwa amtunya Mnungu.

32 Mwiihi abanangwa kwa udamanyi wakwe wiihile, mna mnt'hu ywedi apata kutondowala kwajili yo uwedi wakwe.

33 Mzungu wakelavanya hata kwa mnt'hu mhezi, mna mzungu haukupatikana kwa want'hu wahezi. 34 Uhuwilwa wagenyeza isi, mna wavu wagela soni kwa want'hu wose.

35 Seuta anda na kinyemi kwa wandima wakumanya kiya wakudamanya, mna anda maya kwa wose wakwigala makunt'ho.