1 Ulangilizi wa seuta Lemueli, makanyo ahinizwe na nine: 2 Hugambilei mwanangu?

Hugambilei mwanangu hweleke?

Hugambilei weye hulombeze kulawa kwa Mnungu? 3 Usekubinda ludole lwako kwa wavele, usekuwenk'ha ugoli wako awo wakubananga maseuta. 4 Havikuwagile weye Lemueli, haikuwagila maseuta waungise divai, wakulu nawo waungise mp'hombe, 5 sema wanakolwe niyo wajala miko iyo wenk'higwe, na kuleka kuwenk'ha uwagilwa wawe wata makunt'ho. 6 Wenk'he mp'hombe wadya we mwe kubanika, wenk'he divai wadya wata sungusungu mwe mioyo, 7 wainywe na kujala ukiwa wawe, wasekukumbukila makunt'ho yawe.

8 Walongele wose, kwajili ya uwagilwa wa wose hewekudaha kukelongela wenye. Ugombele uwagilwa wa wadya heweina wambizi. 9 Longa kwajili yawe na kulamula kwa uwagilwa, uwenk'he wakiwa na wadya wakuunga kwambizwa uwagilwa wawe.

10 Mvele mta nt'hogola yedi ni ani akudaha kumpata? Yehe ni ywa yombe kulu kujink'ha iwe dya yombe kulu.

11 Mgosiwe amhuwilisa, naho hakuswesa kint'hu chochose cha yombe kulu.

12 Amdamanyila mgosiwe yedi naho hiyo yaihile, mazuwa yose mwo wikazi wakwe.

13 Azunguila sufu na kitambala king'aile, naho adamanya ndima kwa mikono yakwe kwa kukombatiza.

14 Yehe ni enga meli za uchuuzi, aleta nk'hande yakwe kulawa hale.

15 Yehe akelauka kwinuka, naho awenk'ha mp'huga yakwe nk'hande na kuwapangila ndima wandima wakwe wa kivele.

16 Aikaula nk'honde na kuigula, viigane na icho akupata, ahanda mizabibu mwe nk'honde yakwe.

17 Adamanya ndima zakwe kwa ludole, mikono yakwe ina ludole kwajili ya ndima zakwe.

18 Kamanya kugamba ndima zakwe zamwink'ha upati, adamanya ndima hata nekilo.

19 Aluka nyuzi kwa mikono yakwe mwenye, kwa madole yakwe mwenye afuma suke.

20 Agubula vifumba vakwe kwa wakiwa, achulula mikono yakwe awambize heweeina kint'hu.

21 Want'hu we mp'huga yakwe hawakogoha kukanda kwalosa, kwaviya kila yumwenga ananazo suke za kukebwikaniza.

22 Akedamanyila vigonelo mwo lusazi lwakwe, mavalo yakwe ni ya langi ya zambalau na kitambala king'aile.

23 Mgosiwe kamanyika vedi, ni yumwenga mwa walamuzi wadala vilongozi we isi.

24 Mvele uyo adamanya suke na kuzitaga, naye awatagila wachuuzi wa misipi.

25 Kenk'higwa ludole na nt'hogola, adaha kuseka haheina kogoha kwa mazuwa yakwiza.

26 Agubula mnomo wakwe na kulonga kwa mzungu, icho akulonga ni mahinizo ya kuhuwilwa.

27 Akaula kwa wengele mbuli zose zikudamanyika mwe nyumba yakwe, naho hana usokezi.

28 Wanawe wenuka na kumwitanga mvikilwa, mgosiwe naye amtogola.

29 Agamba, Wavele wengi wadamanya mbuli zo kwehela, mna weye kuwajink'ha wose.

30 Kukehamba vileke want'hu wakuungise ni kukedant'ha, utana wasunguza komboka, mna mvele akumvika Zumbe Mnungu naatogolwe.

31 Mwink'he geleko viligane na ivo adamanye, ndima zakwe zaungigwa zitogolwe hant'hu hohose.