1 Ikutimila ni milosi ya mbilikizi mwana Daudi, uyo Daudi andaga seuta ywa Yelusalemu.

2 Mbilikizi agamba mwo wikazi uno kila kint'hu hakina waambizi. 3 Mnt'hu ana upati wani mwe zindima zakwe zose aha he isi? 4 Cheleko cheza niyo chahalawa niyo cheza kituhu, mna isi yekala iivo mazuwa yose. 5 Zuwa dyatont'homoka na kuswa, na kusunguza ukuswa. 6 Mp'heho yavumila kuhinga kwa mkoma mahanya niyo yahitukila kwa mwenyemzi, akajika yauiya kuzunguluka kwakwe ulo na ulo. 7 Mito yose yaseela kwe bahali, mna ibahali haikumema mbwitu, uko ikulawa imito nuko ikuuya naho. 8 Vint'hu vose vasokeza, hevikudaha kusimuilwa. Ziso hadikusokela kuona naho gutwi hadikusokela ukwiva. 9 Kikunda aaho, nekize kinde aaho naho, ayo yadamanyagwa nayo yakudamanywa, mwe isi hakihali kint'hu kihya. 10 Want'hu wagamba, "Kaula mbuli mp'hya." Bule, aya yalailaga uko kale umwo suwe chandaga kikei kwelekwa. 11 Want'hu wa kale nawande wajaligwa, hata awo wakwiza hawakumbukilwe ni awo nawakitimile.

12 Miye mbilikizi nehinda seuta ywa Izilaeli uko Yelusalemu, 13 nehikaulisa na kupelemba kwa wengele kila kint'hu kilaile mwe isi.

Mnungu nae kawenk'ha want'hu makunt'ho makulu. 14 Hiyaona yose yakudamanywa mwe isi, kugamba hi kint'hu, ni enga kugulusa mp'heho. 15 Kigonjile hakikudaha kuchululwa, na kint'hu hekihali hakikudaha kuwazwa.

16 Ivo, nafanyanyaga mwenye, "Hikepatila mzungu utendese kujink'ha wose wanilongoelaga kulongoza Yelusalemu. Ivo ubala no umanyi hivimanya vedi." 17 Naho nakombekaga kumanya kuzagula umanyi, uhezi na ukilalu, mna nabunk'hulaga kugamba ayo yose ni enga kugulusa mp'heho. 18 Kwaviya mwo umanyi utendese mna kiyangayanga, naho akongezela ubala naande na sungusungu vitendese.