1 Ivo nafanyanyaga mwo moyo wangu hakegamba, nigeze kwa vint'hu va kukebwedeza. Mna hata mwe idyo nadyo nabunk'hulaga kugamba, kudamanya ivo hiyo kint'hu. 2 Mwo luseko nalo naonaga kugamba ni uhezi, Togola mwe kinyemi namo mna kibwai chani? 3 Nagezaga kukeink'ha kinyemi kwa kunywa mp'hombe na kudamanya mbuli za kihezi, mna uku ubala wangu ukalongozwa ni mzungu. Nehazungula kugamba ni kihi chedi want'hu wakuungwa wadamanye mwa mazua aya mageke wakwikala mwe isi ino.

4 Nakongaga kudamanya ndima nk'hulu. Nakezengelaga mazumba makulu na kulima nk'honde za mizabibu. 5 Nakedamanyilaga kiunga cha mabwali na kuhanda maziti ya matunda yehengi. 6 Nasimbaga makawa ya mazi yo kuyomeela ayo maziti. 7 Nagulaga watumwa wa kigosi na wa kivele watuhu nawo welekagwa mwe nyumba yangu. Nandaga na ugoli ubindile wingi mafyo ya ng'ombe na ngoto kujink'ha mnt'hu yeyose ekalaga Yelusalemu. 8 Nakeduganyilaga masawa na zahabu kulawa mwe vindolo va maseuta na kulawa mwe ziisi, name napataga wakemi wagosi kwa wavele na wawele wahombwele wanibwedezese.

9 Naho nandaga mnt'hu mkulu kujink'ha yeyose mwe Yelusalemu, naho nandilisaga na mzungu. 10 Kila naonaga chedi nakipataga, moyo wangu hiunyimile uwedi wowose, kwaviya moyo wangu wawagilagwa na yadya nidamanye na ino neinda nidyo digeleko dyangu. 11 Niyo nafanyanya yose nidamanye, ivo nakombekaga kudamanya ndima, niyo nabunk'hula kugamba yadya yose nidamanye hi kint'hu, neinda ni enga kugulusa mp'heho, hakwandaga na upati wowose mwe isi. 12 Ivo nafanyanyaga kunda na umanyi na kunda mhezi na kubwalata.

Nakeuzaga seuta akwiza naadahe kudamanya kint'hu chani. 13 Ivo miye nabunk'hulaga kugamba umanyi ni wedi kujink'ha uhezi, enga ivo ungazi wili wedi kujink'ha ziza. 14 Mta umanyi kamanya uko akuita mna mhezi hakumanya icho akudamanya. Hata ivo himanya kugamba mta umanyi na mhezi uheelo wawe ni umwenga. 15 Ivo nalongaga mwo moyo wangu. "Ayo nayampate mhezi nayanipate miye. Nii handa na mzungu uno wose? Nalongaga mwo moyo wangu hagamba yose aya hi kint'hu." 16 Ivo elo kwa mnt'hu mta umanyi, enga ivo vikunda kwa mhezi, naajaligwe kwa lupisi luguhi, kwe mazua yakwiza wose nawajaligwe. Enga ivo vili kwa mhezi hata mta mizungu nawabanike. 17 Ivo nawiihiyaga wikazi wose mwe isi. Wikazi wose nounda hi kint'hu naho ni enga kugulusa mp'heho.

18 Ivo nayaihiyaga yose nidamanye mwe isi, kwaviya naungwa nimwasile yudya akwiza kunyuma yangu hant'hu ha miye. 19 Naho niani akuunga ande mmanyi hegu mhezi? Hata ivo yose nidamanye nayande yakwe aha he isi. Ino yose hi kint'hu. 20 Ivo, nafanyanyaga naho mwa yose nidamanye he isi, nafaga chevu. 21 Kwaviya mnt'hu adaha kudamanya ndima kwa umanyi na ubala na mizungu yakwe, akajika amlekela mnt'hu mtuhu heevidamanyile ndima aonele kinyemi mwo upati we ndima yakwe. Ayo yose iviyaiviya hi kint'hu. 22 Mnt'hu apata upati wani kwa ndima zakwe zose na kukombeka kwakwe aha he isi? 23 Kwaviya wikazi wakwe wose nounda wa makunt'ho, ndima zakwe zose nazo zandaga na makunt'ho du hata nekilo ubala wakwe haukuhumula. Ayo yose hi kint'hu.

24 Hakihali kint'hu chedi akudaha kudamanya mnt'hu kujink'ha ukudya no kunywa na kwelelwa ne ndima yakwe.Kumbe idi nadyo dyalawa kwa Mnungu, 25 kwaviya uneva hi yehe niani akudaha kudy na kunda na kinyemi? 26 Kwa mnt'hu akumwelela Mnungu, uyo Mnungu amwink'ha umanyi, ubala, na kinyemi. Mna mta wavu Mnungu amwink'ha kuduganya na kuwiika ugoli akajika amwink'ha mnt'hu amwelele.. Ayo yose ni enga kugulusa mp'heho.