1 Damanya ndima yeyose idya, yadahika wadaha kupata chochose. 2 Wapangile vint'hu want'hu mfungate hegu mnane hant'hu ho upati wako, kwaviya humanyize yakuunga yalaile mwe isi.

3 Mavunde yana mema mazi fula yanya, mti unagweela kwamkoma mahanya hegu kwa mwenyemzi, aho nougweele naho nougone. 4 Walimi wakugojela msimo uzoelwe hawahande mbeyu na wakukawiila mavunde yahalawe naho hawavune kint'hu. 5 Enga ivo hwimanyize sila ya mp'heho kugamba ni ihi, hegu mwana akukula mwe zinda mwa nine, nivo hwimanyize zindima za Mnungu ivo akudamanya vint'hu vose. 6 Handa mbeyu mtondo na nekisingi handa naho kwaviya humanyize nizihi nezihote za nomtondo hegu za kisingi hegu zose nezinde zedi.

7 Ikindedi ung'azi ni wedi, kudiona dizuwa nako kwasangalaza ameso. 8 Hata uneva mnt'hu anekalisa miaka mingi vivihi, aionele kinyemi yose, mna akumbukile mazuwa ya makunt'ho nayande yabinda ingi. Kila kint'hu kikwiza hi kint'hu.

9 Weye mbwanga unde na kinyemi mwo ubwanga wako na moyo wako nao usangale umwo ukei mbwanga, timila uwedi wo moyo wako, mna ukumbukile kugamba Mnungu naakusengele mwa ayo yose.

10 Ivo elo hausa kiyangayanga mwo moyo wako, kenege usekupata masulumizo kwaviya ubwanga na ludole hi kint'hu.