1 Unde na wengele ukaita kwe nyumba ya Mnungu. Ita utegeleze kujink'ha kulava nt'hambiko enga izo wakulava wahezi, awo hewemanyize kugamba ayo wakudamanya yaiha. 2 Usekulonga milosi ya kihezi, naho moyo wako usekunda na kihufya mwo kulonga ho undiilo wa Mnungu. 3 Kwangadika kwingi kwagela sozi, nivo zili simulizi za mhezi zikanda na milosi mingi. 4 Unamwikila Mnungu lagano usunguze kudiusa. Mnungu hakwelelwa ni wahezi, ivo usa lagano udiikile. 5 Ni vedi unanda huikile lagano kujink'ha kuika niyo hudiusile. 6 Kaulisa milosi yako inase kukutenda udamanye wavu, vileke umgambe Mnungu hwaungile kudamanya wavu. Nii umtende Mnungu akuihiye na kuibananga ndima yako? 7 Kwaviya kulota sozi nyingi, naho kudamanya ndima nyingi heziina chochose, kikulu cho kutoza ni kumwogoha Mnungu.

8 Usekwituka kuona mwe isi wakiwa wakahujilwa naho usengelo no uwagilwa wawe ukazaganywa, kila mta nt'hunyo akuwahujila wakiwa ehasi ya mnt'hu mtuhu, naho kulanga ya awo waidi, weyuko wakulu watuhu watendese.

9 Upati we isi ni wambizi kwaajili ya wose, hata seuta naye egutila mwe izo zink'honde.

10 Mnt'hu akuungisa matundu hakwiguta matundu hegu akumunk'hilwa ni ugoli hata anapata hakwiguta. Idyo nadyo hi kint'hu. 11 Mgenyezo wa ugoli wegala mgenyezo wa wata kudya, haluse mta ugoli naye ana upati wani, vituhu vakwe akaula ugoli wakwe du? 12 Nt'hongo za mlimi ni zedi akanda kadya ludodo hegu kadilisa, mna mta ugoli ubindile wingi haukumwink'ha nt'hongo mgoli.

13 Naho hiona mbuli imwenga du yo uwihi mwe isi, mnt'hu akeduganyilaga ugoli mna haukumwambiza chochose mwe makunt'ho, 14 naho ugoli uwo wamchupulukaga niyo waga, naye akanda keleka mwana, hakihali chochose kisigale kwajili ya mwana. 15 Mnt'hu elekwa kimbwigili mwe zinda za nine, naho naahalawe enga ivo ezile. Haahalawe na chochose mwe ivo azungule. 16 Ino nayo ni mbuli iihise, naauye enga ivo ezile, kwaviya kwangadika kwake ni enga kugulusa mp'heho. 17 Mna ekalaga wikazi wakwe wose kwa kinyulu na masulumizo, kwa makunt'ho na manyonge na sungusungu.

18 Aya nayo nabunk'hulaga. Ichedi mwa want'hu ni kudya na kunywa na kunda na kinyemi mwe zindima zakwe za mwe isi, mwa mazuwa ayo mageke enk'higwe ni Zumbe Mnungu, kwaviya ivo nivo awaikile. 19 Yakujink'ha ayo, umwo Mnungu akamwink'ha mnt'hu ugoli na ukulu, amtenda avionele kinyemi vint'hu ivo, kuzumila icho enk'higwe na kuionela kinyemi ndima yakwe ndala, kwaviya ino nt'hunyo ni kulawa kwa Mnungu. 20 Ni kwa nk'hanana ngeke mnt'hu akafanyanya mazuwa yo wikazi wakwe, kwaviya Mnungu amtenda mnt'hu uyo ande na kinyemi mwo moyo wakwe.