1 Enga viya sofulo zifile zikuleka mp'hofa ihile mwo mhemp'he wedi, mna uhezi wahitula umanyi na nt'hunyo.

2 Moyo wa mta mzungu wamlongoza kudamanya ayedi mna moyo wa mhezi wamwazaganya. 3 Mnt'hu mbwalasi hata akagenda mwe sila aswesa ubala. Naho agenda akelavanya kila mnt'hu kugamba yehe mhezi.

4 Uneva kilongozi ywako anakufiila maya, usekunda na kifiki kwaviya moyo wa ujalamu wadaha kuhoza maihi yatendese.

5 Kuna vuma nibunk'hule aha he isi, uwihi ukutendigwa ni vilongozi, 6 kugamba wabwalasi wenk'higwa ulongozi wa kulanga na wata ugoli waguha ulongozi wa hasi. 7 Hiyona watumwa wakugendeza falasi, mna wakulu wagenda lwa viga du enga watumwa.

8 Msimba bome adaha kupolomela mwenye, mmola lukandula alumwa mwenye ni nyoka. 9 Akutula maiwe yadaha kumnumiza mwenye, naho akutula nk'huni naye zadaha kumnumiza mwenye. 10 Ludole lwingi lwaungigwa kwa mnt'hu akutema ne hoya heikutwa, mna unadamanya kwa mzungu noudahe. 11 Uneva mnt'hu mta umanyi wa kuitenda nyoka isekuluma, mna uneva nyoka iyo inasunguza kuluma mnt'hu, umanyi uwo haukudaha kumlagula uyo alumigwe. 12 Milosi ya mta mzungu yamwink'ha nt'hogola, mna mhezi akebanaga kwa milosi yakwe mwenye, 13 akakonga kulonga alonga uhezi, akabindiliza kulonga alonga enga mkilalu. 14 Mhezi alonga haheina kunyamala,

Hakuna yeyose akumanya kikuunga kilaile, naho hehali akudaha kulonga yakuunga yalaile kikanda kibanika.

15 Mbwalasi asokezwa na ndima yakwe mwenye, hata asekumanya sila ya kuuiya kaya.

16 Weye isi hangi we mwenye seuta ywako andaga mtumwa, isi ina vilongozi wakutenda fugo kukongela mtondo. 17 Kuvikilwa weye isi una seuta ywa cheleko kina nt'hunyo, weye una seuta akudya nk'hande kwa lupisi luzumilwe vileke upate ludole kwa mndima za kindedi.

18 Kwajili yo usokezi wa mnt'hu, misomo ye nyumba yakwe yenama, kwo usokezi uuwo nyumba yakwe yadoda.

19 Fugo ni kwaajili ya kwiguta na divai yasangalaza wikazi, mna matundu yabinda mbuli zose.

20 Usekumkumlonga vihile seuta hata uneva ni mwe zifanyanyi, hegu usekumligita mgoli hata ukanda kwe chumba chako, kwaviya madege yadaha kuguha ayo ulongile, na ayo madege yakupuluka yadaha kubwelekeza ayo ulongile.