1 Niani eli enga mta mzungu? Naho niani akumanya chotoko che vint'hu? Mzungu wamwigaila mnt'hu kinyemi, naho wahitula fanyanyi zo mnt'hu kulawa mwe kinyulu.

2 Miye nagamba mzumile ayo akulonga seuta, kwaviya yehe kaika lagano kwa Mnungu. 3 Usekusunguza kuhalawa hakwe, hegu usekugendeela kudamanya yaihile, kwaviya seuta adamanya yakumwelela. 4 Sigilizi ya seuta ni ulosi wa uheelo, niani akudaha kumuuza mwa icho adamanye. 5 Akuzumila sigilizi haapate makunt'ho na mta mzungu naamanye lupisi luzumilwe na mitendele. 6 Kwaviya lwiyuko lupisi luzumilwe na mitendele ya kila mbuli, ikanda want'hu wapata makunt'ho. 7 Kwaviya hahali yeyose amanyize yakuunga yalaile mazua yakwiza, ivo niani akudaha kumgambila yakwiza? 8 Hehali mnt'hu yeyose akudaha kuutoza umuye wakwe asekubanika, naho hehali mta udahi mwe dizuwa dyo kubanika. Mwo lupisi lwa nk'hondo hehali akudaha kuuya kunyuma mwe nk'hondo, viligane na iivo wakutenda hawande na ulekelwa.

9 Aya yose hiyaona mwo upelembi wangu aha he isi, want'hu wamwenga wanda na udahi mwa watuhu, na kuwatenda wasulumile. 10 Niho nawaonaga want'hu wavu, wakamoswa msanga, wadya wazoelaga kwingila na kufosa hant'hu ha kuvikila na kwink'higwa nt'hogola mwo mzi uwo wandile wadamanya aya. Ayo nayo hi kint'hu.

11 Kwaviya want'hu wavu hawakusunguza kusengelwa, ivo mioyo ya want'hu yamema fanyanyi za kudamanya wavu. 12 Hamwenga na kugamba wata wavu wadamanya maihi gana niyo wagendeela kwikalisa mwe isi, mna miye namanya kugamba nevindilise ni vedi kwa want'hu wakumvika Mnungu awo wakumwogoha. 13 Mna hakihali kinyemi kwa wata wavu, woho nawomboke enga kizuli, wikazi wawe hounde mtali kwaviya hawakumvika Mnungu. 14 Kuna mbuli imwenga du niibunk'hule aha he isi, want'hu wedi wenk'higwa yadya wawagilwe want'hu waihi, niyo waihi wenk'higwa yawawagile awedi. Ino nayo nagamba hi kint'hu.

15 Ivo miye natigiza kugamba mnt'hu aungwa ande na kinyemi, kwaviya aha he isi hakihali ichedi kujink'ha ukudya, ukunywa na kunda na kinyemi. Akajika kinyemi chakwe agendeela nacho kwe zindima zakwe mazuwa yose yo wikazi wakwe, mazua ayo enk'higwe ni Mnungu.

16 Kila aho nagezaga kumanya mzungu na kuona ayo yadamanyike aha he isi nabunk'hulaga kugamba wadaha kwikala meso kilo na msi, 17 niyo namanya kugamba ndima zose Mnungu adamanye, want'hu hawakudaha kuzimanya, wata mizungu wadaha kukegamba wamanya mna ikindedi hawamanyize.