1 Hiona mbuli imwenga ihise aha he isi, ikuwasulumiza want'hu. 2 Mnungu amwink'ha mnt'hu ugoli na nt'hunyo na vint'hu vingi vileke anase kuhungukilwa na chochose akuunga, mna hakumwink'ha luneka aonele kinyemi vint'hu ivo, abanika niyo mnt'hu mtuhu na watakwiza wanda nawo nawayaonele kinyemi ayo. Naho iyo nayo hikint'hu naho ni makunt'ho yatendese. 3 Mnt'hu anadaha kweleka wana gana, naho niyo ekalisa mwo wikazi wakwe. Mna uneva mnt'hu uyo hana kinyemi mwo wikazi wakwe hegu uneva anabanika na kuswesa kumoselwa msanga haheina nt'hunyo, nagamba ni vedi kwa mwana elekwe na kubanika, 4 kwaviya kwelekwa kwakwe mwana uyo hikint'hu, zina dyakwe heditambulwe naho. 5 Hamwenga na kugamba haaone ung'azi we dizua hegu kumanya kint'hu chochose. Uyo mwana ana humuilo kujink'ha mnt'hu uyo. 6 Uneva mnt'hu uyo neekale myaka alufu mbili naho hana kinyemi mwo wikazi wakwe ni enga uyo mwana, wose waita hant'hu hamwenga.

7 Want'hu wadamanyisa ndima vileke wapate nk'hande, mna kumunk'hwamunk'wa kwawe hakukuwegusa. 8 Togola mta umanyi apatai kujink'ha mhezi? Hegu mkiwa ana kibwai kujink'ha mnt'hu ho undiilo wa want'hu watuhu? 9 Ni vedi kuona, kujink'ha kwangadika kwa kumunk'wamunk'ha. Yose ayo hi kint'hu, ni enga kugulusa mp'heho.

10 Kila kint'hu kilaile chalailaga aho kale, ivo mnt'hu eli vamanyika, kwaviya msokezi hakudaha kuhigana na mnt'hu mta ludole. 11 Mbuli zinanda nyingi zanda hi kint'hu, togola izo zamwambiza vivihi mnt'hu? 12 Niani akumanya yakumwambiza mnt'hu mwo wikazi wakwe mgihi, wikazi uwo ukomboka enga kizuli? Niani akumanya mwe isi ya kumpata mnt'hu anabanika?