1 Niyo naona masulumizo yose yakulaila mwe isi. Want'hu wakusulumizwa waila, mna hehali yeyose akuwasangalaza. Wasulumizi wana udahi mkulu, nivo vikuleka hakuna wa kuwasangalaza. 2 Ivo nafanyanyaga kugamba, want'hu wabanike wana kinyemi kujink'ha wagima wakwikala mwe isi. 3 Mna ana uwedi kujink'ha awo waidi ni yudya henati kwelekwa, hanati kuona maihi yose yakudamanywa aha he isi.

4 Naho nabunk'hulaga kugamba ndima zose na umanyi wakwe mwe zindima valawa mwo kuhigana, ayo yose hi kint'hu, ni enga kugulusa mp'heho. 5 Mhezi hakudamanya ndima naho uheelo wakwe akekoma na sala. 6 Ni vedi kunda na kidodo hamwenga na utondowazi mwo moyo, kujink'ha kunda na kikulu hamwenga na makunt'ho, ni enga kugulusa mp'heho.

7 Naho naonaga mbuli hi kint'hu vitendese mwe isi. 8 Namuwonaga mnt'hu yumwenga heena mwana hegu ndugu. Hamwenga na ayo andaga akadamanyisa ndima augenyeze ugoli wakwe enga ivo aungaga. Mna akajika akeuzaga mwenye, "Ivi namdamanyila ani zindima izi, naho nii nekeink'ha kiyangayanga?" Yose aya kumbe hikint'hu he isi

9 Ni vedi kunda na mvele kujink'ha kunda wikedu kwaviya waidi awa nawapate maliho yedi kwajili yo undima wawe. 10 Uneva mnt'hu yumwenga anagwa miyawe naamwinule, Mna hangi yehe mwenye mnt'hu akunda ekedu niyo agwa, uyo haande na mnt'hu ywa kumwinula. 11 Naivo waidi wananda hamwenga nawadahe kwambizana, mna ananda ekedu haadahe kukeambiza mwenye? 12 Hamwenga na kugamba mnt'hu yumwenga ekedu adaha kuhumwa ni mnk'hondo, mna wananda waidi nawamhume mnk'hondo ywawe. Hiyo vihufu kukant'ha sigi nt'hatu zinabilingwa hamwenga.

13 Ni vedi mbwanga mkiwa ana umanyi kujink'ha seuta mdala mhezi, uyo heekutegeleza ulangilizi wedi, 14 hata uneva andaga mvugailwa mna haluse kanda seuta, naho hegu elekwagwa mkiwa mna haluse kanda seuta. 15 Nawaonaga want'hu wose wakwikala mwe isi, wamtimilaga yudya mbwanga ahokelaga useuta. 16 Uwazilo wa want'hu nounda hauna uheelo, mna yehe awalongozaga wose, hamwenga na awo nawelekwe nyumani hawamuonele kinyemi, kindedi ayo yose hi kint'hu, ni enga kugulusa mp'heho.