1 Ni vedi mnt'hu ananda na uwedi kujink'ha mavuta ya mhemp'he ya yombe kulu, na zuwa dya kubanika ni dyedi kujink'ha zuwa dyo kwelekwa. 2 Ni vedi kuita kumoselwa msanga kujink'ha kuita kwe fugo, kwaviya wagima waungwa kukumbukila kugamba file yakigoja suwe chose.

3 Kinyulu ni chedi kujink'ha seko, moyo una kinyulu wakiink'ha kufanyanya.

4 Moyo wa mta umanyib wafanyanya kumosa msanga mna moyo wa mhezi wafanyanya kuunga ayedi.

5 Ni vedi kwiva makanyo ya mta umanyi kujink'ha kwiva mila ya wahezi.

6 Kwaviya seko za mhezi ni enga izwi dya miwa mwo moto, aya nayo hi kint'hu.

7 Mta umanyi anamhujila mnt'hu, aketenda enga mhezi naho matundu ya soni yabananga umoyo.

8 Ni vedi hombindilizo we mbuli kujink'ha nk'hongelo ye mbuli yakwe,

Akufinyiliza mwo moyo ni vedi kujink'ha mnt'hu mta weduvi.

9 Usekunda mhufu wa maya, kwaviya maya yekala mndani mwa wahezi.

10 Usekuuza, "Ni lupisi lwani lwandaga lwedi kujink'ha lwa ivi haluse?" Kwaviya hiyo vedi kuuza enga ivo.

11 Mzungu ni wedi enga ivo wili ukipe, naho ni wedi kwa wagima wose. 12 Mzungu ni wamizi enga ivo yeli matundu. Uwedi wo mzungu ni kugamba wamila wikazi wa uyo ananao.

13 Fanyanyeni vedi ndima ya Mnungu, niani akudaha kusalahaza ndima ya Mnungu? 14 Mwe mazuwa yako yo upati unde na kinyemi na mwa mazuwa ya makunt'ho ufanyanye mbuli ino, upati na makunt'ho, Mnungu kayaika aya mazua maidi yagende hamwenga vileke want'hu wase kubunk'hula yakuunga yalaile kulongole.

15 Mwo wikazi wangu howiina kint'hu hiyona vint'hu viidi, muwagilwa akabanika akanda mwo uwagilwa wakwe. Mna naho hiona mnt'hu mwavu akagendeela kwikalisa hamwenga na kugamba yehe mwavu. 16 Ivo usekundilisa ywedi hegu mta umanyi utendese, nii ukekome weye mwenye? 17 Mna usekunda mwavu hegu mhezi, nii ubanike ukanda wikazi wako haunati? 18 Ni vedi utoze dya nk'hongo naho usekudileka dya kaidi kwaviya akumzumila Mnungu naande hale na ayo.

19 Mzungu wamtenda mta uwedi kunda na ludole kujink'ha vilongozi mlongo wo mzi.

20 Hehali mnt'hu ywedi mwe isi akudamanya yedi du haheina kudamanya wavu.

21 Naho usekufanyanya mbuli zose zikulongwa na want'hu, sema uneva mtumwa ywako kugamba kakuhomola. 22 Kwaviya weye mwenye kumanya mwo moyo wako kugamba kuwaligita nk'hanana nyingi

23 Hiyageza ayo yose kwa umanyi hagamba, naunga ninde na mzungu, mna ino hyandile na ludole nayo. 24 Mzungu ni kint'hu kidala naho hiyo vihufu kukikombaganya. 25 Nahitulaga zifanyanyi zangu vileke nikombaganye, na kupelemba na kuuzungula mzungu na kiya kikuungwa mwe zimbuli, na kukombaganya kugamba wiihi ni uhezi, ukilalu ni ubwalasi.

26 Hibunk'hula mbuli imwenga ikulumisa kujink'ha file. Mvele ekale enga mtego, lukunde akukulagisa ni enga lugole lwa kukutegela, mikono yakwe nayo ni enga mnyololo. Mna akumwelela Mnungu amnyilika mvele uyo, mna mta wavu naagwilwe ni uyo mvele. 27 Mbilikizi agamba ayo nibunk'hule umwo hapelemba, hibungula kint'hu kimwenga na kituhu naho, umwo nandile mwa idyo nahaunga. 28 Nikei napelemba mna hikubunk'hula. Mwa wagosi alufu hiona mgosi yumwenga du muwagilwa mna mwa wavele alufu hiyone yeyose. 29 Kaula, hibunk'hula mbuli imwenga du kugamba Mnungu awaumbaga want'hu wedi, mna woho wenye wakezunguilaga makunt'ho.