1 Kwaivo nayafanyanyaga mwa ayo yose, niyo naona kugamba Mnungu alongoza wata mzungu na wadya wakudamanya ayedi. Mna ikanda ni lukunde hegu maya mnt'hu hamanyize, kila kint'hu kwawe hi kint'hu. 2 Kwaviya wose wana uheelo uligane, wakumwogoha Mnungu na wata wavu, awedi na waihile, wakukile na wasavu, wakulava malavo na hewekulava malavo. Uyo eli ywedi kaligana du na mta wavu, naho akukelisa hawasane na heekukelisa. 3 Ino ni mbuli ihise ikulaila aha he isi, kugamba uheelo uligane wawabwiila wose. Naho lupisi lwose lwo wikazi wawe want'hu awo wanda wamema uwihi na ukilalu wakajika wabanika. 4 Mnt'hu yeyose ehamwenga na wata ugima ana kawiilo, ni vedi kuli ugima kujink'ha simba ifile. 5 Kwaviya awagima wamanya kugamba kuna kubanika, mna wabanike hawakumanya chochose, hawana nt'hunyo naho wajaligwa vitendese. 6 Lukunde lwawe na kwiihiya na kumunk'hwa kwawe vose vahalawaga na woho, naho hawande na dyodyose aha he isi.

7 Ita ukadye nk'hande yako kwa kinyemi, naho ukanywe divai yako kwa kusangala kwaviya Mnungu kaizumila ndima yako. 8 Mazuwa yose vala vedi, naho mtwi wako usekuswesa kuhaka mavuta yedi. 9 Uonele kinyemi wikazi wako hamwenga na mkazio umuungise mwo ulu lupisi lwose lwa makunt'ho wink'higwe ni Mnungu, kwaaviya ayo nayo upangilwe mwo wikazi wako mwe ndima yako aha he isi. 10 Kila icho ukuunga udamanye, damanya kwa moyo wako wose, kwaviya uko kwe isi ya wabanike ukuita hakuna ndima hegu mizungu hegu umanyi.

11 Naho hiona kint'hu kituhu aha he isi, kugamba wadahi wakugulukisa hawakunda wahumi mwo uhigani wa nguluko, naho wadahi wa nk'hondo hawakunda wahumi kwe nk'hondo, hegu wata mzungu hiyo wapati we nk'hande, naho wata ubala hawakunda wagoli, naho wata umanyi kukwezwa ulongozi, mna lupisi na luneka lwaweziila wose. 12 Vitendese ni kugamba hahali akumanya lupisi kwakwe niini, enga ivo samaki zikugwilwa nu ulwavu mwe bahali, naho enga viya madege yakugwilwa mwo ulimbo, nivo want'hu wakugwilwa ni mavuma haheina kukawiila.

13 Naho aha he isi nehiona mliganyizo wo mzungu, naho uwo nauungisaga. 14 Handaga na mzi umwenga mdodo wandaga na wakaya wageke. Seuta yumwenga mta udahi, auzungulukaga vileke akump'hukile, 15 mna mwo mzi uwo kwandaga na mkiwa yumwenga mta mzungu, kwa umanyi wakwe auyokolaga umzi uwo, hakwandaga na mnt'hu yeyose amkumbukilaga yudya mkiwa. 16 Niho nagambile, mzungu ni wedi kujink'ha ludole, mna mzungu wa mkiwa wabelwa naho zimbuli zakwe hazikutegelezwa. 17 Ni vedi kutegeleza milosi ya mta mzungu ikulongwa mp'halahole, kujink'ha kutegeleza izwi dya kilongozi mw kiyeti cha wahezi. 18 Mzungu ni wedi kujink'ha vitoanilo va nk'hondo mna mta wavu yumwenga abananga ayedi yose.