1 Kila mbuli yalaila kwa lupisi lwakwe aha he isi.

2 Lupisi lwa kwelekwa na lupisi lwa kubanika.

Lupisi lwa kuhanda na lupisi lwa uvuni .

3 Lupisi lwa kukoma na lupisi lwa kuhonya.

Lupisi lwa kuzenga na lupisi lwa kumola.

4 lupisi lwa kuila na lupisi lwa kuseka.

Lupisi lwa kuhongeza na lupisi lwa kwanga.

5 Lupisi lwa kuduula maiwe na lupisi lwa kuyaduganya hamwenga kwa kuyadamanyila ndima.

Lupisi lwa kuwaduganya want'hu na lupisi lwa kuleka kuwaduganya.

6 Lupisi lwa kuzungula na lupisi lwa kwaza.

Lupisi lwa kuika na lupisi lwa kuduula.

7 Lupisi lwa kutatula na lupisi lwa kusuma.

Lupisi lwa kunyamala na lupisi lwa kulonga.

8 Lupisi lwa kuunga na lupisi lwa kuihiya.

Iviyaiviya na lupisi lwa nk'hondo na lupisi lwa utondowazi.

9 Mchuuzi apata upati wani mwe zindima zakwe zose? 10 Miye hiona ndima ndala izo want'hu wenk'higwe ni Mnungu. 11 Mnungu katenda kila kint'hukilaile kwa lupisi lwakwe. Naho hakuli yeyose akudaha kukombaganya yose ayo adamanye, naho kakitenda kise kukombaganya mbuli zomboke na izo zikulongole. 12 Namanya kugamba, kwa mnt'hu iyuko mbuli imwenga du yo kumuwagila, ni kunda na kinyemi mwo lupisi lwose lwo ugima wakwe.

13 Suwe chose chaungwa kudya na kunywa na kunda na kinyemi mwa yadya kipatile mwe zindima zetu. Ayo ni uwagilwa kwa Mnungu.

14 Naho himanya kugamba dyodyose akudamanya Mnungu dyekala ulo na ulo. Hakihali kikudaha kugenyeza hegu kuhungula, Mnungu kadamanya ivo vileke want'hu kimwogohe na kummvika yehe. 15 Chochose kikulaila ivi haluse, chandaga aho kale, kikwiza kulongole chajikaga kale, Mnungu naye ayatendaga yadya yomboke yakeuiye naho.

16 Iviyaiviya hiona kugamba, housengelo uwihi nao wiyaho, naho hant'hu ho uwagilwa ukwank'walu nawo wiyaho. 17 Ivo nafanyanyaga mwo moyo wangu, Mnungu naawasengela wata wavu na heweena wavu, kwaviya kaika lupisi kwa kila mbuli. 18 Naho iviyaiviya nalongaga mwo moyo wangu kugamba, Mnungu awageza want'hu vileke awalagise du ivo weli. Woho ni enga makala matuhu. 19 Kwaviya dikuwalaila want'hu nidyo dikulaila kwe viumbwa vituhu. Wose wahema iviyaiviya, mnt'hu hi ywedi kujink'ha makala, ayo yose hikint'hu. 20 Wose wawagilwa na kuita hamwenga, wose walawa mwe sanga naho wose nawauye mwe sanga. 21 Niani amanyize kugamba muye wa mnt'hu waita kulanga mna muye wa makala waita hasi? 22 Naho nabunk'hulaga kugamba hakihali kint'hu chedi kimwenga kwa mnt'hu kudamanya kujink'ha kuzionela kinyemi zindima zakwe nivo vikuleka kiaha. Hahali yeyose naakivuze kulawa mwo kubanika vileke kize kionele kinyemi wikazi wetu.