1 Umkumbukile Mnungu ywako mwa mazuwa yo ubwanga wako, umwo ukanda ukei kudalahala niyo wagamba, "Heninde naho na kinyemi mwo wikazi uwo." 2 Umkumbukile ukanda ung'azi wako haunati kusila, nt'hondo no mnenge vikei kwingila ziza, mavunde nayo yakei kwigala fula. 3 Mwe dizuwa diya dya waamizi we kaya wakazingiza na viga vako vitogile navo vikagonja, na meno yako nayande hayakudaha, meso yako nayo yakanda hayakukaula. 4 Umwo zimboni za magutwi yako zikasita, maizwi ya ndima nayo yakanda yakeagiliza, umwo mkenulwa ni maizwi ya madege, mna naho akajika maizwi ayo yose nayagendeele kukeagiliza. 5 Mwo lupisi ulo nowogohe kunda hant'hu ha kulanga, kugenda mwe sila nako nokunde kwatisa, na mwo mtwi wakwe nounde umema fii, mna weye nounde huna kint'hu chochose nouungise naho.

Niho mnt'hu naakeitile kwe dihumuilo dyakwe dya mazuwa yose, wakuhongeza nao nawande wakanda wakazunguluka zunguluka mwe sila. 6 Mkumbukile Muumbi ywako mwo mbwanga wako, kwaviya diyaho zuwa nedibule kwo uheelo nounde enga mkufu wa masawa, naho haunati utulike enga lwiga lwa zahabu, hegu enga biga dikutulika kwe disima, naho enga bika dikutulikila kwe dizumi. 7 Naho luvumbi noluuye mwe sanga na muye ywako nouuye kwa Mnungu akuumbaga.

8 Miye mbilikizi nagamba, vint'hu vose hi kint'hu, naho havina wambizi.

9 Mna uyo mbilikizi andanga na mzungu ivo agendeelaga kuwahinyiza want'hu umanyi, yehe ahimaga na kufanyanya niyo apelemba kwa wengele niyo atula ngelo zibindile wingi. 10 Mbilikizi akombekaga kupata mbuli zedi za kwelela na kiya awandike ni chedi naho ni kindedi. 11 Simo za wata umanyi ni enga mliganyizo wa nk'home isonk'hoke, naho milosi yawe ni enga mitunga igomandilwe mwo mti, nivo zili zimbuli za wakulu mwe midugano kulawa kwa mdimi yumwenga.

12 Naho mwanangu ukajink'ha ayo uzumile makanyo hauhali uheelo wowose wo kuwandika vitabu vibindile wingi, naho kusomesa kwasokeza.

13 Uwazilo we zimbuli zose ni uno, mbuli zose zivika kale. Mwogohe Mnungu naho uzitimile zisigilizi zakwe kwaviya ayo nayo want'hu wakuungwa kuyatimila. 14 Kwaviya Mnungu naasengele udamanyi wetu wose, hata yadya yakudamanywa kwa kinyele yande yedi hegu yaihile.