1 Ukemi wa Selemani utendesa wedi kujink'ha ukemi wose.

2 Uninonele no mnomo wako,

kwaviya lukunde lwako lwanitenda ninde na kinyemi kujink'ha divai.

3 Mhemp'he wako wevika vedi,

naho zina dyako ni enga mhemp'he ugidigwe.

Nivo vikuleka wali wakuungisa.

4 Sunguza kuniguha kiitanye,

seuta kanigala kwe chumba chakwe.

naho nekikuonele kinyemi na kukwangila.

nekitunye lukunde lwako kujink'ha divai.

kaula ivo viwagilwe kwa wavele kukuungisa.

5 Nyuwe wavele wa Yelusalemu,

miye ni mtitu mna ni mbwanga.

enga mahema ya Kedali,

naho enga mapazia ya Selemani.

6 Msekunikaulisa kwajili yo utitu wangu,

kwaviya zuwa nidyo dilekile handa mtitu.

wandugu zangu waniihiya.

wanitendaga mwamizi mwe migunda ye mizabibu.

mna mgunda wangu mwenye we mizabibu hiukaulise.

7 Unigambile weye huungise.

Wadimila hii fyo dye zingoto zako?

Naho nouzihumuze hii ikabula nomsi?

Nii miye huzungule

mwa mafyo ya wadimi watuhu?

8 Weye humanyize kugamba kuhombweela kujink'ha wavele wose?

Genda utimile difyo dya vibehela,

ukazunguile mani ye vibehela vako,

hagihigihi ha mahema ya wadimi.

9 Weye hukuungisa.

Hikuliganyiza na falasi vele dya Falao ikugendeza gali dya nk'hondo.

10 Ziheleni zako zakutenda uhomboele,

singo yako nayo ikanda na mikufu ya yombe.

11 Mna nekikudamanyile mikufu ya zahabu.

hamwenga na mahambo ya masawa.

12 Seuta umwo andaga mwe difumbi dyakwe,

mavuta yangu yo mhemp'he yenezaga mhemp'he kila hant'hu.

13 Myangu nimuungise kwangu ni enga mhemp'he ukwitangwa manemane,

umwo akanda mgati mwe kifua changu.

14 Myangu hukuungisa ni enga kabwali,

kakubwalika mwe nk'honde ze mizabibu uko Engedi.

15 Kaula ivo wili mbwanga.

Meso yako ni enga ya suwa.

16 Kaula ivo uwagilwe weye hukuungisa,

naho ubwanga wako hiubweda,

lusazi lwetu nalo ni enga mani yekwani.

17 Mikola ye nyumba yetu neinde ya maziti yakwitangwa mielezi.

mp'handa zakwe nezinde za maziti yakwitangwa mibeloshi.