1 Miye ni bwali dikulawa Shaloini

naho ni enga bwali kulawa kwe dikolongo.

2 Enga dikwani mgati mwe miwamba ngoma.

Nivo eli uyo humuungisa mwa watuhu.

3 Enga mpela mwe miti ya kwe mbago.

nivo eli uyo humuunga mwa wabwanga,

nna kinyemi hwikala hasi ye kizuli chakwe,

kunda kwako hagihi na miye ni enga kudya tunda dimwiile.

4 Aniguhaga mpaka kwe chumba che fugo.

kunilagisa lukunde lutendese enga kilagiso kwangu.

5 Niguse kwa zabibu.

unigele ludole kwa ludyo lwa matunda yakwitangwa matofaa,

kwaviya hyaganika kwa kumuungisa.

6 Mtwi wangu ugonela nt'hendelo ya kumoso,

na mkono wo kulume nawo wanikumbatila.

7 Nawakanya nyuwe wandele wa Yelusalemu,

enga ivo keli kapala hegu mbala,

msekusongeza hegu kwimula lukunde,

mpaka aho lupisi lwakwe lukeza kubula.

8 Neva izwi dya miyangu humuungisa,

hiza na nguluko naho haguluka mwo mnima

akazunguluka mwe vigulu.

9 Myangu humuungisa ni enga kapala naho enga swala.

kakimala hagihi no lukandula lwetu,

akasungila mwe dilanga,

akaunga kuona kundani.

10 Myangu nimuugise anigambaga na kunikemela.

Inuka elo myangu hukuungisa

So elo kikeitile.

11 Kaula lupisi lwa masika lwomboka,

fula nazo zisila.

12 Mabwali yasuka kila hant'hu,

na lupisi lwa kukema lubula,

izwi dyevika mpaka kwe migunda yetu.

13 Miti ya mitini ikonga kuiva,

mizabibu nayo isuka,

naho yalava mhemp'he wedi.

Soo elo myangu hukuungisa kijatilane.

14 Weye ni enga suwa ikefisile,

mndani mwe zimp'hako zo luwe.

Hake hukaule futa yako, nive diizwi dyako

kwaviya izwi dyako dyedi, futa yako nayo ihomboela.

15 Kuna want'hu wamwenga wekale enga vikuli vidodo,

unase kuvileka vinikump'hukile.

16 Uyo myangu humuunga ni ywangu miye name ni ywakwe.

Yehe adima ngoto zakwe mwa mani yadegede.

17 Mpaka aho zuwa dikant'hont'homoka

na vizuli vikahauka.

Uya kwangu weye hukuungisa.

unde enga kapala naho enga swala mnanga mwo mnima wa Beteli.