1 Lwayo lwako luwagilisa

weye mwana kiseuta,

viga vako mwe ivo uvaile vilatu hiutana uwo,

enga iwe dya yombe kulu disanigwe ni msani mdahi.

2 Lukuvu lwako ni enga lwiga,

Holwikuswesa divai ihanganywe,

Zinda zako nazo enga kiumbiko cha ngano,

kizungulusilwe mani yakwitangwa yungiyungi.

3 Matombo yako ni enga swala mapasa,

naho ni enga mbala mbili.

4 Singo yako ni enga mnala wa mp'hembe ya nt'hembo,

Meso yako ni enga vizuto va mzi Heliboni,

hagihi no lwivi lwa Bet Labi,

mp'hula yako ni enga mnala wa Lebanoni,

uwo ukukaula mwo mzi wa Damesiki. q 5 Mtwi wako enga nu mnima wa Kalimeli,

Fili zako zikebilingabilinga enga zambalau,

uwedi wako wadaha kumtaha hata seuta.

6 Kaula ivo wili ywedi naho kuhombweela,

kwa lukunde lwako lwedi.

7 Weye kuumbigwa vedi enga mti wa mtende,

matombo yako ni enga tambi dya nt'hende.

8 Nagambaga nenikwele mwo mtende uwo niyo natoza matambi yakwe,

matombo yako yande enga matambi ya zabibu,

muye wako nawo unde enga mhemp'he wa tunda dikwitangwa matofaa,

9 mnomo wako nawo unde enga divai yedi,

yaseela mp'halahole mpaka kwa uyo miyangu humuungisa.

yetika mwo mnomo wakwe na mwa meno yakwe.

10 Miye ni ywakwe uyo humuungisa,

yehe naye anionela nk'wina.

11 Soo weye hukuungisa, wize kiite kwo mgunda,

kikaike wikazi, kikekale kwe zikaya.

12 Nekisunguze vileke kiite kwe migunda ya mizabibu,

kikakaule uneva ibwalika,

naho uneva mabwali yakwe yakonga kugubuka,

na uneva mikomamanga ikonga kulava mabwali,

uko nuko nohulagise lukunde lwangu.

13 Mhemp'he wedi umema,

hagihi no lwivi lwetu yeyaho matunda yedi ye hengi,

yose mahya naho yamwenga ya mazuwa ya kunyuma,

ayo yose hwikile weye miyangu hukuungisa.