1 Umwo nagonile mwo lusazi lwangu

Nehilota hamzungula myangu humuungisa mwo moyo wangu.

Namzungulaga mna himpatile.

2 Nenukaga hazunguluka mwo mzi,

mwe sila na hata mwe sila mp'handa.

Hamzungula yudya humuungisa.

Namzungulaga mna himpatile.

3 Wamizi awo wakazunguluka mwo mzi wanionaga.

Umwo wakazunguluka mwo mzi nawauzaga.

"Togoleni mmuona myangu humuungisa?"

4 Ivo nize najike kulagana nawo namuonaga uyo humuunga.

Namtozaga naho himlekile ahalawe.

Mpaka aho namwigalaga kaya kwa mnala.

5 Nawakanya nyuwe wavele wa Yelusalemu.

Enga ivo ili mbala na nt'hohe msekumunk'hilwa na uhabwasi,

mpaka aho lupisi lukeza kubula

6 Ni kint'hu chani kikulawa kwe dijangwa enga mnala wo mosi,

kina mhemp'he wedi wo ubani na manemane,

na mavumba ayo yakutagwa ni wachuuzi?

7 Kaula Selemani kenulwa mwe difumbi dyakwe dyo useuta,

akazungulukwa ni wamizi milongo mtandatu,

na watowani wadahi wa Izilaeli.

8 Wose ni wadahi wa kutowana na sime.

kila yumwenga ywawe ni mdahi wa nk'hondo.

naho kila yumwenga ana sime,

mwo kukeika lumwe umwo wanakump'hukilwa nekilo.

9 Seuta Selemani enulagwa mwe difumbi dyo useuta,

difumbi didamanywe kwa mbao zedi kulawa Lebanoni.

10 Mikimailo yakwe yagubikagwa na masawa,

mp'hapi zakwe zihambwa kwa zahabu,

hant'hu ha kwikaila hagubikagwa kwa kitambala cha zambalau,

wasumaga vedi kwa kiwalo cha lukunde na wavele wa Yelusalemu.

11 Soni elo nyuwe wavele wa Sihoni mumkaule seuta Selemani,

kavalwa taji iyo nine aikaga mwo mtwi wakwe

mwe dizuwa idyo alombaga,

idyo moyo wakwe wandaga na kinyemi.