1 Weye mvele uhombweele,

kaitahi uyo ukumuunga?

Kahinga hii uyo ukumuungisa,

vileke kikwambize weye mwo kumzungula?

2 Uyo humuunga kaita mwe kiunga chakwe

Aho ikudegeda vihandwa,

yehe awadimila ngoto zakwe,

na kuduganya mani yadegede.

3 Miye ni ywakwe naye ywangu.

Azidimila zingoto zakwe mwa mani yadegede.

4 Weye hukuungisa uywedi enga mzi ukwitangwa Tiliza

kuhombweela enga mzi wa Yelusalemu,

watisa enga fyo dya watowani dinule bendela.

5 hake kaula kunk'handa

ukanikaula wanigela kiyangayanga,

fili zako ni enga za fyo dya mbuzi,

zikuseela mwo mnima wa Gileadi.

6 Meno yako yangala enga ye difyo dya ngoto,

zikulawa kwo kogelezwa,

izo kila imwenga ikanda na mapasa,

naho haihali ikale ikedu.

7 Funda zakwe zigubikwe ni valo ni enga mavuta ya mhemp'he

zigubikwe nu ushungi wakwe.

8 Vadahika weyaho malikia milongo mtandatu na wawele milongo mnane,

hamwenga na wali na mazanga hewekuwazika!

9 Mna suwamanga yangu ikint'hile ni imwenga du,

naho uyo niye akuuungiswa ni nine,

uyo niye abwedeswe nu umwelesi,

wandele wamkaula niyo wamwink'ha zina niye mvikilwa,

malikia na wawele wamuona,

niyo wamtunya kwa ukemi wakagamba,

10 Niani uyu ifuta yakwe enga mgingu?

Ywedi enga mnenge,

ung'azi wakwe nao enga zuwa,

amweka mweka enga nt'hondo mwo ulanga?

11 Hingila mwe kiunga cha miti ya milozi,

nikaule masukiza ya mwe dikolongo,

na kukaula uneva mizabibu isuka,

mikomamanga nayo uneva yabwalika.

12 Handa nikei kubunk'hula,

zifanyanyi zangu ziniika mgatigati mwa magali ya nk'hondo

yakugendezwa ni falasi.

13 Uya weye mvele wa Shulami

vileke kikukaule.

Nii mwaunga mnikaule miye Mshulami,

enga mwaunga mkaule wila wa mahanaimu

mwa mafyo maidi ya watowani?