1 Ikindedi myangu hukuungisa kuhobweela!

Naho meso yako yedi yagubikwe ne dishela,

fili zako ni enga fyo dya mbuzi zikupilikapilika,

mbuzi zikuseela mwo mnima wa Gileadi.

2 Meno yako yang'alisa enga fyo dya myate ya ngoto,

zikant'higwe mazoya haluse ivi,

zikulawa kwo kogela.

kila imwenga ikanda na mapasa

hauhali mwate wa ngoto hata umwenga hewiina mwana.

3 Milomo yako ni enga luzi lwink'hundu.

Naho mnomo wako uwagiliswa,

funda zako nazo zigubikwe nu ushungi wako,

ni enga komamanga dituligwe hagati.

4 Singo yako ni enga mnala wa Daudi

uwo uzengigwe vedi kwajili ya kuikila vitoanilo.

Mwo mnala zitungikwe ngula alufu imwenga, zose zikanda za watowani wadahi.

5 Matombo yako ni enga wana swala waidi mapasa,

izo zikudya hana mani yadegede.

6 Nenikale mwo mnima kukulawa mavuta ya mhemp'he,

mwe kagulu kana ubani,

kubula aho kukatandazuka,

ne diziza nadyo dikahalawa.

7 Weye myangu hukuungisa kutendesa kuhombweela.

Naho miye hikuona lema dyodyose.

8 Mtumizwa ywangu soo, kihalawe Lebanoni,

kiileke hale Lebanoni,.

Seela kulawa kwo lunenengwa lwo mnima wa Amana,

kulawa kwe milima ya Senili na Helimoni,

kulawa mwe zimp'hanga uko zikwikala simba na suwi.

9 Weye mtumizwa ywangu kuubwedeza umoyo wangu,

kwa kunikaula lumwenga du,

na kwa usalu wako uwo wa mwe singo.

10 Weye mtumizwa ywangu, lukunde lwako hiluonesa mwiile,

kwaviya lukunde lwako luna mwiile kujink'ha divai,

mhemp'he wako nawo wevika kujink'ha vilungo vovose.

11 Milomo yako yadondomosa uki.

Lulimi lwako enga lugeligwa uki na mele,

mhemp'he wedi we zisuke zako nawo ni enga miti ya Lebanoni.

12 Weye mtumizwa ywangu hukuungisa ni enga kiunga kizungulusilwe mnulu.

weye ni enga n'choko ya mazi igubikwe na ngubiko,

13 Weye ni enga kiunga cha makomamanga

kina matunda yedi kujink'ha yose,

hamwenga na miti ya hina na nalido,

14 na nado na zafalani na sombasomba na mdalasini

hegu mavumba ye hengi.

Manemane na udi, vakula uumwo,

ikanda ni hamwenga ne miti mituhu ina mhemp'he.

15 Weye ywi n'choko ya kiunga,

sima dya mazi yo ugima,

vizuto vikuseela kulawa mwo mnima wa Lebanoni.

16 Soo weye mp'heho kulawa kwa mweye mzi, wize nawe mp'heho kulawa kwa mkoma mahanya,

mvumile mwe kiunga changu,

mhemp'he wakwe wenele mwe kiunga,

yudya humuungisa engile mwe kiunga chakwe,

akadye matunda yemwiile yemwe kiunga.