1 Vandile enga mkulu ywangu,

uyo onk'hezwagwa ni mnala,

Ivo hata uneva nadugane na weye kuse,

Nehikukumbatila naho hehali naakafanyanya kugamba hidamanya vihile.

2 Hegu nehikulongoza mpaka kwe kaya kwa mnala,

yehe anihinize lukunde

Hegu nehikwink'ha divai yedi,

naho nehikwink'ha divai yangu ya makomamanga.

3 Mkono wako wa kumoso wi hasi yo mtwi wangu

na mkono wako wa kulume wanikumbatila.

4 Nawakanya nyuwe wavele wa Yelusalemu,

msekwiingila mwo kukeunga, mpaka lupisi lukeza kubula.

5 Niani uyu akulawa kwe nyika

uku akamwigamila uyo akumuunga

Hasi yo mti wa matofaa aho nyokwe akwinulaga ubovu

Hadya nyokwe aonaga usungu

na nyokwe hadya akwingilaga nyumba.

6 Nitowe enga kilagiso mwo moyo wako

enga lagiso mwo mkono wako

kwaviya lukunde luna ludole enga file

finju nazo ni enga kikuta

ukoka enga moto ivo ukukweela vitendese.

Wakweela enga lubalula

7 Mazi mengi hayakudaha kuuzima lukunde

malawo nayo hayakudaha kuuzima

Enga ivo mnt'hu akageza kugula lukunde

icho naapate ni lubezo du.

8 Kinanae lumbu dyetu mdodo

uyo heenati kukula

Togola kimtendelei lumbu dyetu

umwo anatumizwa?

9 Uneva andile lukandula

nekimzengela mnala wa masawa

Hegu uneva andile enga lwivi

nekimwiika kwa mbao za mielezi,

10 Miye nehinda lukandula

Na matombo yangu ni enga minala yakwe

Mwe meso yakwe nehinda

enga mta kwigala utondowazi.

11 Selemani andaga na mgunda wa mizabibu

hant'hu hakwitangwa Baal Hamoni

adiink'hizaga kwa walimi

kila yumwenga enk'hizaga matundu alufu imwenga.

12 Migunda yangu ye mizabibu ni yangu

uwo mgunda wangu mwenye

Ivo weye Selemani wikale na matundu yako

Na kila mnimi wa matunda ekale na magana maidi yakwe.

13 Weye wili mwo mgunda

wambwiya zangu weva izwi dyako

Ivo miye name nitegeleze izwi dyakwe

14 Sunguza kwiza weye hukuungisa

guluka enga dondolo ikukwela mnanga mwo mnima ina miti ikulava mhemp'he.