1 Nengila mwe kiunga changu,

mkazangu humuungisa,

naduganya manemane na vilungo vina mhemp'he,

nadya kivuna changu cha uki,

nanywa divai yangu na mele.

Wambuya zangu

wambuya zangu iteni mkadye no kunywa

Naho mnywelese nyuwe wambuya zangu.

2 Nagonaga mna moyo wangu wandaga meso,

tegeleza! Miyangu humuungisa aunga nimkomoele,

nikomoele mkazangu hukuungisa.

Suwa yangu heiina lema,

kwaviya mtwi wangu ujabala na mnyuzu,

fili zangu nazo ni mnyuzu ya nekilo.

3 Hihambula kale mavalo yangu

neniyavale vivihi naho?

Hihaka kale mazi viga vangu,

nii naho nivigele usavu?

4 Aho niyo myangu humuungisa atoza ulwivi,

moyo wangu nawo niyo wanda na kinyemi.

5 Nenukaga na kumkomoela ulwivi myangu nimuungise.

Mikono yangu imema mavuta ya mhemp'he,

vidole vangu navo vadondomosaga mavuta ya mhemp'he,

umwo naditozaga didanga hakomola ulwivi.

6 Namkomoelaga ulwivi myangu nimuungise,

mna andaga kaita kale,

moyo wangu wandaga na kinyulu umwo ahalawaga,

namzungulaga mna himpatile,

himwitanga mna hanitike.

7 Wamizi wo mzi wanionaga,

umwo wakazunguluka mwo mzi,

wanitoaga na kunilumiza,

na kunihoka divalo dyangu.

8 Nawakanya nyuwe wavele wa Yelusalemu

mkamuona uyo humuungisa,

mgambeni nahuma kwajili ya lukunde lwakwe.

9 Weye uhombweele kujink'ha wavele wose.

Uyo ukumuunga evivihi kujink'ha wagosi wose

vikukutenda ulombeze ivo mwo moyo wako?

10 Myangu humuungisa hi ubwanga uwo, naho ana ludole.

Mwa wagosi alufu mlongo, yehe ni mdahi ekedu.

11 Mtwi wakwe wedi enga wa zahabu yedi,

fili zakwe zikebilingabilinga,

nt'hitu tilili enga kungulu.

12 Meso yakwe yalem'huka enga suwamanga ihank'handa ha kazuto,

suwamanga ihakile mele niyo akimala mnk'handa mwa kazuto.

13 Funda zakwe ziwagilwa enga kiunga cha vilungo,

vikulava mhemp'he,

Milomo yakwe yedi enga zani dikwitangwa yungiyungi,

dikutomosa mavuta ya mhemp'he.

14 Mikono yakwe iumbigwa vedi, ni enga nk'home ya zahabu,

ihambigwe kwa madini yakwitangwa klisolito.

Umwili wakwe ni enga hembe dya nt'hembo ditoigwe msasa,

dihambagwe kwa madini yakwitangwa yakuti samawi.

15 Viga vakwe ni enga mikimailo ya maiwe yakwitangwa alabasta,

ikimigwe kwe visimiko va zahabu ikukizwe.

kakimala aho enga mnima wa Lebanoni,

ni yedi enga miti ikwitangwa mielezi.

16 Mbuli nyingi akuzilonga ni zedi vitendese

ikindedi yehe kawagilisa,

uyu humuungisa niye miyangu,

naho uyu niye mbwiyangu,

nyuwe wavele wa Yelusalemu.