1 Wanangu, mwive ayo akulonga tati yenyu, tegelezeni kwa wengele vileke mpate ubala. 2 Kwaviya nawenk'hani malagizo yedi, msekujala mahinizo yangu. 3 Miye name nandaga mwana mta ise, nandaga mwana nikedu huungiswa ni mnala. 4 Tate nakanihiniza iki, "Utozese ulosi wangu mwo moyo wako naho utoze sigilizi zangu na weye nowikalise. 5 Waungwa kunda na mzungu na umanyi, unase kujala hegu kulemela ulosi wangu. 6 Unase kuleka mzungu, nuwo noukulele, uungise vileke ukwamile. 7 Mbuli yedi vitendese ni kunda na mzungu, lava chochose unanacho ukepatile umanyi. 8 Uutozese mzungu na uwo umanyi neinkwink'he nt'hunyo, naho una utozesa noukwink'he nt'hunyo. 9 Naakwink'he taji yedi mwo mtwi wako nouwink'higwe taji yedi itendese." 10 Mwanangu tegeleza na kuhokela ulosi wangu, vileke upate miyaka mingi yo kwikala. 11 Hikulagisa sila yo mzungu, naho hikulongoza mwe sila yo uwagilwa. 12 Umwo ukagenda houkindilwe naho unaguluka houkobadike. 13 Tozesa mahinizo yo mzungu unase kuleka yahauke mwako, yaamile kwa wengele kwaviya uwo nuwo ugima wako. 14 Unase kunda hamwenga na waihi, hegu kutimila migendele ya want'hu waihile. 15 Kenege ne sila iyo ihile, hituka uite hale. 16 Waihi hawakugona hawanadamanye yaihile, hawapate nt'hongo hawana mbanange mnt'hu. 17 Kwaviya woho wadya nk'hande ikulawa mwo uwihi, na kunywa divai ikulawa mwe nk'humbizi.

18 Mna sila ya want'hu wedi ni enga ung'azi wa kilokilo, uwo ung'azi wakwe walangaza mpaka nomsi vitendese. 19 Mna sila za want'hu waihi ni enga ziza dititihale, hawakumanya icho kikuwatenda wakobadike.

20 Mwanangu tegeleza kwa wengele na kuhokela makanyo yangu, wive sigilizi zangu. 21 Sema unaleke zihauke mwako, naho yatozese mwo moyo wako. 22 Kwaviya ayo ni ugima kwa mnt'hu akuyapata, naho nuwo mti mwo mwili wakwe wose. 23 Amila umoyo wako kwa wengele wose, kwaviya umwo mwalawa nch'oko zo ugima. 24 Wikale hale na want'hu waihile, hegu milomo yako isekutambula milosi yo udant'hi. 25 Meso yako yakaule kulongole, naho ukaulise kulongole mazuwa yose. 26 Ziike vedi sila zako noumbokele, lugendo lwako lwose nolwo nolunde lwedi. 27 Usekuhituka kumoso hegu kulume, wikale hale no uwihi.