1 Mwo mwaka wa katatu wa kulongoza kwakwe seuta Koleshi ywa Uwajemi, Danieli uyo etangwagwa Beliteshaza enk'hagwa ugubulo. Ulosi wo ugubulo uwo wandaga wa kindedi kwaviya noukamlagisa nk'hondo nk'hulu. kuukombaganya ulosi weo ugubulo uwo wamwizilaga mwa maona.

2 Mwo lupisi ulo, miye Danieli nandaga nahongeza kwa lupisi lwa majuma matatu. 3 Hidile nk'hande inamwiile naho hidile nyama hegu kunywa divai, naho hihakile mavuta kwa lupisi lwose lwa majuma matatu.

4 Mwe dizuwa dya milongo miidi na kane dyo mwezi wa nk'hongo nandaga hikimala mnk'handa yo mto Tigilisi. 5 Nakaulaga kulanga niyo namuona mnt'hu availe valo ding'aile na kukekaka mwe kigudi msipi wa zahabu yedi ilawile Ufazi. 6 Mwili wakwe wang'alaga enga madini yakwitangwa zabalajadi, futa yakwe yandaga enga lumwemwe, meso yakwe nayo yandaga enga ndilija za moto, mikono yakwe na viga vakwe vang'alaga enga shaba isukulwe, izwi dyakwe dyavumaga enga izwi dya mdugano mkulu wa want'hu.

7 Maona aya nayaonaga miye Danieli nikedu. Na wadya want'hu nandaga nawo hawayaonaga maona aya, mna wogohesaga, niyo wanyilika na kugenda kukefisa. 8 Miye nasigalaga nikedu hakaula maona ayo yakwehela. Ludole lwangu lwanisilaga, langi ye futa yangu nayo yahitukaga valekaga visekunda vihufu kuni kombaganya. 9 Umwo nize nive izwi dyakwe nagwaga hasi kifulifuli na kutozwa ni nt'hongo zizamile. 10 Niyo mkono wanitoza na kunikimalisa, nafikaga madi uku handa hiketozela hasi ne vifumba vangu naho handa nikei nazingiza.

11 Mtumigwa ywa kwe mbingu niyo anigamba, "Danieli weye mnt'hu ukuungiswa, kimala utegeleze kwa wengele mbuli huunga hugambile kwaviya hisigiilwa kwako." Umwo andaga akanigambila mbuli iyo, miye nakimalaga hazingiza.

12 Yehe niyo anigamba, "Danieli usekogoha. Mnungu keva kulombeza kwako, kukongela zuwa diya dya nk'hongo wize uone ni vedi ukeseleze ho undiilo wakwe Mnungu vileke upate kukombaganya. Miye hiza kwajili ya ayo ulombeze. 13 Mna mkulu ywa maseuta wa Uwajemi anikindilaga kwa lupisi lwa mazuwa milongo miidi na dimwenga, niho Mikaeli yumwenga ywa awo wakulu, ezaga na kunambiza, kwaivo namwasaga uko hamwenga na mkulu ywa maseuta wa Uajemi. 14 Haluse hiza kukugambila mbuli izo zikuunga ziwalaile want'hu wako mwo lupisi ulo lukwiza, kwaviya maona ayo uyaone ni ya lupisi lukwiza."

15 Umwo andaga akanigambila ayo, nafunamilaga hasi niyo nanda hina dya kulonga. 16 Niho mtumigwa ywa kwe mbingu adosaga mnomo wangu, name nakongaga kulonga hamgamba yudya akimale hagihi na miye, "zumbe ywangu, maona aya yanigaila kinyulu kikulu, naho yanitenda hihungukilwa ni ludole. 17 Zumbe ywangu miye mndima ywako nadaha vivihi kulonga na weye? Hina ludole naho nasiilwa nu umuye."

18 Yudya mtumigwa aonekaga enga mnt'hu anidosaga naho name niyo nenda na ludole, 19 niyo anigamba, "Usekogoha weye ukuungiswa ni Mnungu, unde na utondowazi."

Utoge naho unde mdahi, umwo eze kilonganye napataga ludole niyo namgamba, "Zumbe ywangu kwaviya kutenda ninde na ludole longa kiya noukaunga ulonge."

20 Naye anigambaga, "Togola, kumanya nii heza kwako? Haluse neniuye nitowane no mkulu ywa Uajemi, name umwo haita mkulu ywa Uyunani neeze. 21 Mna nohugambile yadya yawandikwe mwe kitabu che kindedi. Hahana hata yumwenga akunambiza mwa awo ila Mikaeli mwamizi ywenyu.