1 Seuta Dalio aonaga ni vedi asagule wakulu gana dimwenga na milongo miidi wamwambize mwo useuta wakwe wose. 2 Iviyaiviya asagulaga wakilmalizi watatu, Danieli akanda yumwenga ywawe, vileke wawakimaile wadya wakulu watuhu kwa kudima upati wa seuta. 3 Ivo Danieli akelavilizaga mwenye mwa wadya wakimalizi na wakulu kwa nt'hogola ananazo, vilekile seuta akapanga kumwiika kunda mkulu mwe zimbuli zo useuta wose. 4 Iyo ileka wadya wakulu hamwenga na wakimalizi wagezaga kuzungula mzungu wa kumlongeleza Danieli mwo ukimalizi wakwe mwe zindima ze kiseuta. Mna wadundugaga kupata mzungu kwaviya Danieli andaga mhuwilwa, naho haoneke kunda na uwihi wowose. 5 Wadya want'hu niyo wagamba, "Hekipate mbuli yoyose ya kumlongeleza Danieli, haluse kizungule kint'hu akudamanya mwo kumvika Mnungu ywakwe."

6 Ivo wadya wakulu na wakimalizi kwa hamwenga waitaga kwa seuta niyo wamgamba, "Weye seuta Dalio wikale mazuwa yose! 7 Wakimalizi wo useuta na wambizi na wakulu na walangilizi na wose wakulongoza kizumilana kugamba seuta alave sigilizi kwa kutigiza kugamba, mnt'hu yoyose akumlombeza mnungu yeyose, kwa lupisi ulo lwa mazuwa milongo mitatu yakwiza, mnt'hu yeyose heekutimila sigilizi iyo, aduulwe mndani mwe dibome dya simba. 8 Haluse weye seuta ulave sigilizi naho uigele kiwalo chako vileke ise kuhitulwa, viligane na sigilizi za Wamedi na Waajemi izo hezikudaha kuhitulwa." 9 Ivo seuta Dalio niyo aika kiwalo sigilizi iyo. 10 Danieli eze amanye kugamba sigilizi idya itoelwa lugong'ondo, aitaga kwe chumba chakwe cha kulanga icho malanga yakwe yakomokaga kuhinga Yelusalemu. Danieli afikaga madi niyo amlombeza Mnungu ywakwe, nk'hanana nt'hatu kwa zuwa.

11 Want'hu wadya waikile mzungu mwa Danieli wabunk'hulaga kugamba Danieli alombeza wambizi kwa Mnungu ywakwe. 12 Ivo want'hu awo waitaga kwa seuta niyo wamlongeleza Danieli kwa idya sigilizi niyo wagamba, "Togola hutoile lugong'ondo kugamba kwa lupisi lwa mazuwa milongo mitatu kusekunda na mnt'hu yoyose akuzumilwa kulombeza kint'hu chochose kwa mnungu yeyose hegu kwa mnt'hu yeyose mna kulawa kwako weye seuta naho yeyose heetimile sigilizi ino naadulwe mwe dibome dya simba?"

Seuta niyo etikila, "Heiye, nivo vili, viligane ne sigilizi ya Wamedi na Waajemi iyo haikudaha kuhitulwa."

13 Niyo wamgamba seuta, "Danieli uyo yumwenga mwa wadya watahigwa kulawa isi ya Yuda hakogohe weye seuta naho hatimile sigilizi iyo wiikile. Yehe alombeza nk'hanana nt'hatu kila zuwa."

14 Seuta eze eve mbuli iyo engilagwa ni kinyulu kikulu. Atailaga amyokole Danieli, agezaga kuzungula kila sila ya kumyokola mpaka zuwa dyaswa. 15 Wadya want'hu waitaga kwa seuta Dalio wakanda fyo niyo wamgamba, weye seuta, "Umanye kugamba viligane ne sigilizi ya Wamedi na Waajemi hahana sigilizi hegu miko iyo seuta ailavaga ikudaha kuhitulwa."

16 Niho seuta Dalio alava sigilizi akagamba, Danieli agwiligwe na kuduulwa mwe dibome dya simba. Seuta amgambaga Danieli, "Mnungu ywako ukumvika mazuwa yose naakuyokole!" 17 Iwe niyo dyegalwa na kuikwa mwo mnomo wa diya dibome, seuta naye niyo adigela kiwalo cho useuta wakwe. Wakulu wambizi wakwe nawo wagelaga viwalo vo ukulu wawe vileke kusekunda na yeyose akudaha kumyokola Danieli mwe dibome. 18 Ivo seuta auyaga kwe nyumba yakwe ye kiseuta naho kilo chose hadyaga chochose, ivo hadamanye fugo yoyose, naho hapatile nt'hongo.

19 Kilokilo, seuta Dalio enukaga niyo asunguza kuita kwe dibome dya simba. 20 Umwo eze abule hagihi na diya dibome amwitangaga Danieli kwa izwi dya kinyulu, "Danieli mndima ywa Mnungu ywa kwe mbingu, Togola Mnungu ywako ukumvika mazuwa yose kadaha kuzitenda zisimba izo zisekukukoma?" 21 Danieli niyo amhitula seuta, "Weye seuta wikale mazuwa yose! 22 Mnungu ywangu atumaga watumigwa wakwe wa kwe mbingu niyo wafupa milomo ye zisimba izi, nazo hazinikomile kwaviya miye naonekaga hina masa kwakwe naho hidamanye mbuli yoyose iihile kwako weye seuta."

23 Aho seuta andaga na kinyemi vitendese, niyo alava sigilizi Danieli alavigwe mwe diya dibome. Ivo wamlavaga, Danieli naye andaga hapatile masulumizo yoyose kwaviya nakanda kamhuwila Mnungu ywakwe. 24 Seuta asigiilaga wadya want'hu wamlongelezaga Danieli kwa lulimi, wagwilwe na kuduulwa mndani mwe diya dibome dye zisimba hamwenga na wavele wawe na wana wawe. Eloo, umwo wandaga wakei mpaka hasi, simba zawagwilaga na kuwafunc'ha niyo zatula mavuha yawe yose.

25 Niho seuta Dalio awawandikilaga want'hu wa si zose na want'hu wose na milosi yose mwe si yose,

"Mvikilwe! 26 Nasigiila kugamba want'hu wose mwo useuta wangu waungwa wamwogohe na kumvika Mnungu ywa Danieli,

kwaviya yehe ni Mnungu mta udahi,

naye ekala mazuwa yose,

useuta wakwe haukudahika kubanangwa, naho ulongozi wakwe hauna uheelo.

27 Yehe akombola na kuyokola, adamanya kilagiso na vihungi kwe mbingu na kwe isi, kwaviya kamhonya Danieli kulawa mwo kukomigwa ni zisimba."

28 Ivo wikazi wa Danieli wandilisaga wedi mwo lupisi lwo ulongozi wa seuta Dalio mwo ulongozi wa Koleshi Muajemi