1 Mwo mwaka wa kaidi wo ulongozi wakwe, seuta Nebukadineza alotaga sozi yamgelega kinyulu niyo aswesa nt'hongo. 2 Ivo seuta awetangaga, wagangana na wagonezi na wasai wa Wakalidayo vileke weze wamgambile kiya alotile. 3 Seuta awagambaga, "Hilota sozi inigeile kinyulu, elo naunga nimanye kugamba yanigaaze."

4 Woho wamhitulaga seuta kwa milosi ya Kialamu, "Seuta wikale mazuwa yose! kigambile wandima wako nawo nawakutapitile isozi yako."

5 Seuta awahitulaga, "Ulosi wenye unilawa, uneva hamnanigambile isozi yangu no kuitapita neniwasajangeni naho nenimole pele zinyumba zenyu. Nigambileni isozi yangu naho niyo mwanitapitila. 6 Mnanigambila no kunitapitila isozi neniwenk'heni mageleko na nt'hunyo naho nomnde want'hu wakulu. Ivo elo nigambileni no kunitapitila isozi iyo."

7 Woho wamhitulaga naho wakamgamba, "Seuta akigambile suwe wandima wakwe isozi yakwe naswe nekimtapitile isozi."

8 Seuta niyo awagamba nyamaleni, "Himanya kugamba mwageza kunazaganya kwaviya hilamula kint'hu kimwenga, 9 uneva hamnanigambile isozi neni wasulumizeni kwa hamwenga. Nivo vikuleka mwageza kunidant'hiliza mkakawiila kugamba mbuli zadaha kunda zedi kwenyu. Mnde kunigambila isozi niho nenimanye kugamba mwadaha kunitapitila."

10 Woho wamhitulaga seuta, "Mwe isi hahali yoyose akudaha kudamanya icho akuunga seuta, kwaviya hahali seuta hegu zumbe hegu kilongozi aungaga mbuli enga iyo kwa walaguzi hegu wasai hegu kwa Wakalidayo 11 Iki akuuza seuta kitendesa udala. Hahali akudaha kumlagisa seuta, milungu heikwikala mwa want'hu niyo du ikudaha kutenda ivo."

12 Ino yamtendaga seuta aihiwe na kunda na maya vamtendaga asigiile kugamba wata mizungu wose mwe isi ya Babeli wakomwe. 13 Ivo niyo sigilizi yalavigwa kugamba wata umanyi wose wakomwe ikanda ni hamwenga na Danieli na weyawe.

14 Umwo kilongozi mkulu ywa wamizi wa seuta aitaga kwo kuwakoma wata mizungu wose wa Babeli, Danieli alongaga naye kwa wengele na mizungu. 15 Amuuzaga mndima ywa seuta, "Nii seuta asigiila kwa maya ivi?" Alioko mndima ywa seuta amtambalisaga vedi Danieli.

16 Danieli asunguzaga kuita kwa seuta niyo alombeza lupisi vileke amtapitile isozi iyo. 17 Danieli auyaga kaya niyo akuwagambila weyawe awo, Hanania na Mishaeli na Azalia icho kilaile. 18 Awagambaga walombeze mbazi kwa Mnungu ywa kwe mbingu kwajili ye sozi idya vileke yehe na wata mizungu weyawe wase kukomwa hamwenga na wata mizungu watuhu wa Babeli. 19 Aho nekilo isozi iidya yalagisagwa naho kwa Danieli, niyo Danieli amtogola Mnungu ywa kwe mbingu,

20 akagamba, "Mnungu atogolwe mazuwa yose!

Mizungu na udahi ananavo yehe.

21 Yehe ahitula lupisi na misimo

awaika na kuwausa maseuta,

ni yehe akwink'hiza mizungu no umanyi.

22 Avitenda vint'hu vifisigwe na va mwe kinyele vimanyike,

viya vifisigwe mwo lwiza yehe kavimanya

naho yehe mwenye kazungulukwa ni ung'azi.

23 Nakutogola na kukutunya weye Mnungu ywa wakale wangu.

Kunink'ha mizungu na ludole

kunink'ha yadya hulombeze

naho kukilagisa cho kumgambila seuta."

24 Ivo Danieli aitaga kwa Alioko uyo asigiilagwa ni seuta kugamba awakome pele wata mizungu wose wa Babeli niyo amgamba, "Use kuwakoma awa want'hu, hake nigale kwa seuta name nenimkumbuse isozi yakwe no kumgambila kugamba nivo yagaaze."

25 Aaho Alioko amwigalaga Danieli kwa seuta niyo agamba, "Himuona Myahudi egalwe aha akudaha kuku kumbusa isozi yako no kukugambila nivo agaaze."

26 Seuta amuuzaga Danieli uyo akwitangwa Belitishaza, "Weye wadaha kunigambila kiya nilotile naho niyo wanitapitila?"

27 Danieli niyo ahitula, "Hahali mnt'hu mta umanyi hegu msai hegu mgangana hegu mgonezi naadahe kukugambila isozi yako no kukutapitila. 28 Mna eyuko Mnungu ywa kwe mbingu akudaha kuzitenda sozi zimanyike. Yehe kamlagisa seuta akwitangwa Nebukadineza kiya kikuunga kilaile mwa mazuwa yakwiza.

29 "Weye seuta, umwo wandaga kugona walotaga sozi zakulagisaga mbuli zikuunga zilaile, niyo yudya akutenda mbuli ze kinyele zimanyike akulagisa mbuli zikuunga zilaile. 30 Mna mbuli izi hazitendigwe zimanyike kwangu kwaviya nna mizungu itendese kujink'ha wose, mna zitendigwa zimanyike kwangu vileke weye seuta ukombaganye zifanyanyi zo moyo wako.

31 "Weye seuta, wakaulaga naho waonaga hili tali dyakimalaga naho dyang'alisaga naho dyawatendaga want'hu wogohese. 32 Mtwi wakwe wandaga udamanywa kwa zahabu ikukise, kifuwa chake ne mikono yakwe navo vandaga vidamaywa kwa masawa, izinda zakwe ne mawambo yakwe vidamanywa kwa shaba, 33 iviga vakwe navo ivo vidamaywa kwa kilama, nyayo zakwe nazo zidamanywa kwa kilama, nt'hendelo int'huhu yandaga ya ulongo. 34 Umwo wandaga ukadikaula, dihili idyo, kwalailaga iwe dyamokaga ko mnima haheina kukwafigwa ni mnt'hu. Dyadihamizaga dihili idyo niyo dyatulika vibesubesu. 35 Aaho kilama kiya no ulongo ne shaba ne disawa ne zahabu vandaga enga nt'hifu ya hant'hu ho kuhetela mwo msimo wo ulozo. Mp'heho niyo yavipuputisa hale hakisigale hata kabesu kamwenga. Mna diya iwe ditulile dihili dyahitukaga kunda mnima mkulu na kumemeza isi yose.

36 "Seuta, aya yose nilongile nayo ulotile. Haluse goja kikutapitile ino isozi yako. 37 Seuta, weye ywi mkulu mwa maseuta wose. Mnungu ywa kwe mbingu kakwink'ha weye useuta mwa maseuta wose no udahi no ludole no uwedi utendese. 38 Want'hu mwe isi na makala na madege yose yaikwa mwo udahi wako. Kiwalo chako weye ni enga mtwi udya we zahabu. 39 Weye ukeza kuhalawa nowize useuta mtuhu una ludole ludodo naho hiyo enga uwako. Akajika naho nowize useuta mtuhu wa katatu uliganyizwe ne shaba, uwo noulongoze si yose. 40 Naho nowize useuta mtuhu wa kane uliganyizwe ne kilama, uwo wavitulatula no kuvihonda vint'hu vose. Naivi elo enga ivo kilama kikutulatula na kuvihonda vint'hu vose, useuta uwo houtimile kudamanya enga midamanyile ye ziseuta nt'huhu zomboke. 41 Enga ivo uwone iviga ne vidole, nt'hili imwenga ulongo wa kuumbila nyungu int'huhu nayo kilama. Nuko kugamba useuta uno noukepange. Mna useuta uwo nounde na ludole lwa kilama ludodo enga ivo uone kilama kihangane no ulongo wa kuumbila nyungu. 42 Naho enga iivo, vidole ve viga vakwe, nt'hili yakwe ni dya kilama, nt'hili nt'huhu nadyo ulongo. Useuta uwo nawo nounde na ludole mna naho nounde msokezi. 43 Iviya iviya, enga ivo uone kilama kikehanganye ne ulongo wa kuumbila nyungu, vilongozi wa si nawo nawakehanganye kwa ndoza mna hawalungane enga ivo kilama hekikudaha kulungana no ulongo. 44 Mwo lupisi lwa maseuta awo, Mnungu ywa kwe mbingu naaike useuta utogile houkudaha kubanangwa, want'hu watuhu hawauhume na kuulongoza useuta uwo. Mna useuta uwo nouhondehonde seuta zose nt'huhu, mna woho wenye nowikale mazuwa yose. 45 Naho enga ivo udione diiwe dimokile dyenye ukwo kwo mnima, naho kugamba neditulatula ikilama ne shaba no ulongo ne disawa ne zahabu. Mnungu ajink'hile wose kamgambila seuta kiya kikuunga kilaile. Isozi ino ni ya kindedi naho utapita wakwe nawo ni kindedi."

46 Aho niyo seuta Nebukadineza agwa kifulifuli hasi na kumfikila madi Danieli na kuwagamba want'hu wamlavile nt'hambiko na ubani. 47 Naho seuta amgambaga Danieli, "Kindedi Mnungu ywako ni Mnungu mkulu kujink'ha milungu yose na Zumbe mkulu kujink'ha maseuta wose, naho niye akugubula kinyele kikefisile, kwaviya weye kakutenda udahe kugubula kinyele iki." 48 Akajika seuta amtunyaga Danieli niyo amwink'ha nt'hunyo ikulise, amtenda kunda kilongozi mkulu mwo ulongozi wa mkowa wose wa Babeli na wata mizungu wose wa Babeli. 49 Danieli amlombezaga seuta, naye niyo awaika Shedilaki na Meshaki na Abedinego kunda wakimalizi we zimbuli zo ulongozi wa mkowa wa Babeli. Mna Danieli asigalaga mwe dizumba dye kiseuta.